Shillong: U Nongïalam Liangpyrshah bad nongïalam ka Trinamool Congress (TMC), u Mukul Sangma, u la kyntait ïa ki khubor ba ki MLA ka TMC kin leit ban pynïasoh sha ka Bharatiya Janata Party (BJP).
Haba kren sha ki lad pathai khubor ha Shillong, u dr Mukul u la pynpaw ïa ka jingsngewkhia kaba khraw halor ka jinglong jingman ha ka kam saiñpyrthei ha ka ri hi baroh kawei.
U la ong da ka jingskhem ba ki MLA ka TMC ki dang ïeng skhem ha ka nongrim jong ka party bad ka Liangpyrshah, bad kin bteng ban trei na ka bynta ka bha ka miat jong u paidbah.
U Dr Mukul u la pdiang ruh ba ki don ki bor kiba pyrshang ban khring ïa ki MLA sha kiwei pat ki seng saiñpyrthei. Hynrei, u la kyntu ïa ki MLA ban long kiba peitngor bad ban ïeng skhem ha ki nongrim jong ki.
“Ka jingpyrshang ban thied ne khring ïa ki MLA sha kiwei pat ki party ka long ka jingma kaba khraw ïa ka synshar paidbah, namar ka pynkylla ïa ka rai ba u paidbah kaba u la ai lyngba ka ilekshon.” ong u Mukul.
Haba phai sha ki jingjia ha ki snem ba la leit, u Dr Mukul u la pynkynmaw ba watla ki kam kum kine ki ju jia ha ka por ba ka Congress ka dang don ha ka bor, hynrei ha kine ki snem ba mynta ka rukom treikam ka la nang paw ha ki jylla bapher bapher, kynthup ïa Arunachal Pradesh, Maharashtra, West Bengal bad Delhi.
U la pynpaw ba ka jingïeng skhem jong ki MLA ha ka nongrim jong ka party bad ka jingburom ïa ka rai jong u paidbah ka long kaba kongsan ban pynneh ïa ka jinglong ryntih jong ka synshar paidbah