Shillong: Ka Sorkar jylla ka la pyllut 4 hajar klur tam ha ki 22 tylli ki State Public Sector Enterprises (SPSEs) ne ki kompeni ka sorkar ha ka jylla ha kine ki san snem hynrei ka jingmih pat tang T. 20 lak tyngka, kaba long kumba suhkhun u lum, mih pynban da u dkhan du.
Katkum ka CAG Report 2024-25, ka seng Hynniewtrep Youth Council (HYC) ka kam ba ka Sorkar jylla ka la bei pisa haduh T. 4,444.43 klur ha kine ki karkhana sorkar haduh ka 31 tarik Lber 2025, hynrei ka jingïoh ha u snem 2024-25 ka long tang T. 20 lak.
U President ka HYC u bah Roy Kupar Synrem ula pynpaw ïa ka jingsngewkhia ba la mang shuh sa T. 467 klur ha u snem 2024-25 wat hapdeng ka jingïoh jingïarap kaba duna.
Halor kane, ka HYC ka la ujor sha ka Public Account Committee (PAC) ban, tohkit bniah ïa baroh 22 tylli ki SPSE. Ka seng ka dawa ruh ban peitngor lada don kano kano ka jingbym lah ban bud ïa ki rukom treikam paidbah bad ban pynngat ia ka jingkitkhlieh ïa kito kiba don bynta lada don ka jingbymbiang. Ka dawa ruh na ka Sorkar jylla ban aiti ïa ka Action Taken Report hapoh ka por ba la buh.
Ula ong ruh ba ka jingkitkhlieh, ka jingshai paidbah bad ka jingpynbeit ïa ki jingbymbiang ka dei ban long ka bynta ba kongsan ha ka jingpynïaid jong ka Sorkar jylla.
Ki katto katne ki State Public Sector Enterprises ki long ka Meghalaya Energy Corporation Limited (MeECL), Mawmluh Cherra Cements Limited (MCCL) kaba la khang dam, Meghalaya Industrial Development Corporation Ltd. (MIDC), Meghalaya Mineral Development Corporation (MMDC), Meghalaya Tourism Development Corporation (MTDC), Meghalaya Transport Corporation (MTC), Meghalayan Age Limited (MAL) nalor kiwei.