Shillong: Ki driver kali kamai ka Meghalaya hapoh ka lama ka All Khasi Meghalaya Tourist Taxi Association (AKMTTA) kim pat rai ban pdiang ne em ia ki jingai jingmut ka sorkar ia ka jingong ka sorkar jylla Meghalaya ba kan khang ia ki kali kamai nabar ban leit sha ki jaka jngohkai khnang ban kyntiew ia ki kali jong ki trai jylla namar ba ka shu kren tang da ka ktien.
Ha ka jingialang kaba khot ka sorkar Meghalaya mynta ka sngi bad ki nongniah kali kamai ka Meghalaya, kala pynsngew ban pynsangeh noh ia ki kali kamai nabar ban kit ia ki nongwankai hynrei na ka liang ki nongniah kali kila kwah ba ka sorkar kan pyni da ki kam, ym tang ka ktien.
U nongialam ka seng nongniah kali kamai bah Balajied Jyrwa ula ong ba halor kane, ka sorkar Meghalaya kan sa khot jingialang biang ban iathir ia kane ha ka 28 tarik mynta u bnai.
La iathir ruh ban wad ia ki jaka ban ieng ki kali kiba wan nabar khnang ba kin shim pat da ki kali na kane ka jaka ban leit buh sha ki jaka jngohkai. La thaw ruh ia ka Committee ban khlieh da u Commissioner ka tnad Transport ban bishar bniah ia kane.
Ha kawei ka jingialang pat hapdeng ka Assam, Meghalaya bad ki nongniah kali kamai na Assam bad Meghalaya, kaba la don lang u symbud myntri rangbah ka Meghalaya bah Sniawbhalang Dhar, u myntri ka tnad Border Protection ka Assam u Atul Bora, la iathir ia ka jingiakylliang kamai hapdeng ki kali kamai ka Assam bad ka Meghalaya ne ka Reciprocal Transport Agreement (RTA) ha kaba yn pynkhie im biang ia ka Joint Action Committee ban bishar bniah ia kane. Lyngba kane ka RTA, ki kali kin wan buh nongjngohkai ha ki jaka kiba la buh bad kane kan tehlakam ia ki kali kit nongwankai kat shaba mon haba ki wan rung sha kane ka jylla.
Ka jingialang ka la rai ruh ba ka sorkar Assam kan buh ia u number helpline ban iarap ia ki driver bad kawei pat ka long ban kyndang ia ki dalal kiba shim komishon kaba jur bha ha Khanapara, Paltan Bazar ka jur bha.
Ka sorkar Assam ka la kular ruh ban ai jaka ieng ia ki kali kamai na Meghalaya ha phyllaw ka kad liengsuin, bad ha steshon rel ha Kamakhya.
Ka jaka ieng ha Airport ha Guwahati, yn pynbeit ia ki sorkar Assam ban ym shah pyndik shuh ki kali kamai.
Ha kajuh ka por, u Anirban Goswami, General secretary Tourist Transporter Association of Assam ula ong ba ka jingialang ka long kaba sngew hun ha kaba ka nongialam na Meghalaya bad Assam, kil kular ban pynduh ia ki dalal ne ki agent ban pyniaid thep briew ia ki kali kamai ha Assam bad Meghalaya bad la mynjur ruh ban don ka Joint Committee kaban don lang ki kamai kali na Meghalaya bad Assam bad ki briew sorkar jong kine ki jylla, ban iapynbeit ia ki jingeh.
Thaw Joint Committee ka Meghalaya-Assam |phah wad jaka ieng kali ka sorkar Meghalaya ki driver kamai
