Shillong: Ka Central Agricultural University (CAU), Imphal, kan pyllong ia ka jingiathir halor ka phang, ka jingrep sboh mariang ban ieng ha la kijong ki kjat bad ka roi ka san ki nongkyndong ne “Natural Farming: Pathways to Self-reliant Farming and Rural Prosperity (NCNF 2026)” naduh 9 haduh 11 tarik Nailur, 2026, ha College of Post Graduate Studies in Agricultural Sciences (CPGSAS), Umiam, Meghalaya.
Ha kane ka jingiathir, palat 400 ngut kin wan iashim bynta na 21 tylli ki jylla ka ri India bad 51 tylli ki jaka pule ba iadei bad ka rep ka riang kynthup 95 ngut ki nongrep ba paw khmat kiban iasam ia ka jingtip sha ki para nongrep. Ki nongrep kin ioh ruh ka lad ban iakynduh markhmat bad ki saiantis rep.
Haba kren sha ki lad pathai khubor mynta ka sngi, u Prof. Dwipendra Thakuria, Dean, CPGSAS, Umiam bad u Organiser ka NCNF 2026, ula ong ba kane ka jingialang ka dei ka lynti ban pynkhie im ia ka rukom rep da ka sboh mariang bad ban pynkhlain ia ka roi ka san ki nongkyndong khamtam kiba iadei bad kane ka thain North East da kaba pyndonkam da ki tiar juk stad saian.
U Prof. Thakuria ula kdew ia 6 tylli ki mat kiba kongsan kiba kynthup ia ka jingkylla ka mariang, ka jingring sdot ka khyndew sboh, ka jingduh ki kynja ba im, ka jingioh na ka rep ka riang, ka jingbam bad ki jait jingbam ba tei, bad ka sawdong sawkun.
Ka NCNF 2026 kan iathir ia kine na ka bynta ban pynkyntiew, ban pynkhlain ia ka rep ka riang katkum ka jingai ka mariang khlem da pyndonkam dawai.
Ia ka jingialang yn plie u Lat ka Assam u Lakshman Prasad Acharya, ban don lang u Narayan Singh Kushwah, myntri ka tnad Social Justice bad Horticulture Department, ka sorkar Madhya Pradesh, nalor u Timothy D. Shira, u myntri ka tnad rep ka jylla Meghalaya.
Ia kane ka NCNF 2026 yn pyllong ryngkat ka jingiatreilang ka ICAR, New Delhi; DST–North East Centre for Technology Application and Reach (NECTAR), Shillong; Rani Lakshmi Bai Central Agricultural University, Jhansi; Dr. Rajendra Prasad Central Agricultural University, Pusa; bad ka Gujarat Natural Farming Science University, Gujarat.