Shillong: Ki khun ki hajar ka Hima Langrin kila wan tur biang sha ka KHADC ha ka 19 tarik mynta u Nailar 2026 ban dawa weng ia u Syiem ka Hima, Paiem Nongtei Singh Syiemiong na ka khet.
Ki nongialam naduh bah Wadladkyrpang Langrin ula kam ba ka jingkhot dorbar u paiem Nongtei ha ka 7 tarik ha Phlangdiloin, ka dei ka jingiuhroit ia ka hok u khun u hajar ha kaba khlem ai lad ban pynsngew ki khun ki hajar. Ula ong ba ki khun ki hajar ki leit sha ka dorbar ban pan jingshai halor ka Management Board jong ka Hima.
Katba u bah Bladeistar Syiemiong u Acting Syiem barim ka Hima, ula kynnoh ba u Syiem Nongtei um ju pyni ia ka jingkhein jingdiah jongka Hima kaba shai ia ka jingioh jinglut kum ka bai surok, bai patta bad kiwei bad ki khana ka Hima kiba ialam sha ka kynrum kynram naduh kham mynshwa khamtam kiba iadei bad ka khyndew ka Hima.
Katba na ka liang u President ka Seng Samla Hima Langrin bah Blodingwel Langrin ula kam ba ka dorbar kaba khot u paiem ha ka 7 tarik kam long kaba iaid ha ka rukom kaba dei namar ba la kynnoh ba ki khun ki hajar kim ioh lad ban pynsngew iathir ia ki mat ki jura jongka Hima. Ula kyntait ia ka jingkynnoh ba la shah kynshoit ha ki businessman, ne ki politician hynrei ka dei ka kam jong u khun u hajar. Ula kyntu ia ka KHADC ba kan sngap ia sur u khun u hajar bad ban weng mardor ia u Syiem na ka khet.
Kumjuh ka general secretary kong Perdalin Mawlieh ka la kam ba ka jingmih ka huri hura ha ka dorbar kaba khot u Syiem ka dei namar ba khlem ioh ia ka jingshai halor ka Management Board jong ka Hima. Ka la ong ba ka daw ba ki wan sha KHADC ka dei namar ba ki khun ki hajar kim ioh ia ka jingshai na u Syiem.