Shillong: Ka jingialang ki arliang mamla hapdeng ka Meghalaya bad Assam ka la neh lai kynta ban iathir halor ka jingmih ka huri hura ka jingkhang kali ML ban rung sha Assam bad ka jingkhang ia ki kali AS ban rung sha Meghalaya, hadien ba la mih ka jingjia na ka jingiaid rally ha ka 19 tarik mynta u bnai ha Shillong.
Ka jingialang ka la long mynta ka sngi ha Koinadhara State Guest House, Guwahati, Assam kaba la mihkhmat u Symbud Myntri Rangbah ka Meghalaya bah Sniawbhalang Dhar bad na Assam la mihkhmat u myntri sorkar u Atul Bora.
Hadien ba la iathir ha ka jingialang, la shim ia ki rai 14 tylli kiba kynthup kaba nyngkong, ka Meghalaya la pynpaw ia ka jingsngewsih halor ka jingjia ha ka 19 tarik Nailar 2026 ha Shillong bad ka la pynthikna ban shim kam tyngeh ia kito kiba donkti.
Kaba ar, la kem ia 3 ngut ki nongialam ka KSU bad la pynngat ha ka Meghalaya Maintenance of Public Order Act.
Kaba lai, la rejister 15 tylli ki ejahar halor kane ka jingjia. Kaba saw la ithuh san ngut kiba deng bula ne kah dur khmat kiba donkti ban hiar thma ia ki kali bad shoh briew.
Kaba san, la thaw ia ka Special Investigation Team (SIT) ban wad ia kiba donkti ha katei ka jingjia. Kaba hynriew la pynthikna ban ai ia ka iaid ka ieng kaba shngain ia ki kali Assam bad palar 3770 la iarap ban mih na Meghalaya sha Assam, kaba hynniew, ka Assam Control Room ka la ioh pdiang 54 tylli ki phone na ki 175 ngut ki briew kiba la iarap ban pynpoi sha Assam katba na Meghalaya la ioh pdiang 379 tylli ki phone call kipan jingiarap. Kaba phra, kumba 500 tylli ki kali ba don sha Meghalaya kila ioh rung sha Assam lyngba ka jingiarap ki bor sorkar, kaba khyndai, yn pyndep ia ka jingpynkynriah ia ki briew hapoh 48 kynta kiba sahkut, kaba shiphew, la thaw ia u HOTLINE ban iatreilang ki bor pulit na Assam bad Meghalaya ha ka jingpeit u IG, Special Branch, Assam, bad IG, Law & Order, Meghalaya.
Kaba khadwei yn don ka Permanent district-level joint committees hapdeng Deputy Commissioner, Nongpoh, bad Deputy Commissioner, Kamrup Metropolitan, kaba khadar, kan don ka Joint committee on tourist transport hapdeng u Commissioner/Secretary-level Transport kine ki jylla ryngkat ki nongmihkhmat na ki seng kali kamai tourist ka Assam bad Meghalaya.
Kaba khadlai, ban pyniaid ia ki briew khlem jingthut ha kaba ka sorkar Assam bad Meghalaya kin shim ia ki lad ki lynti halor kane kynthup ka iaid ka ieng kiba na ka Barak Valley sha Meghalaya bad kaba khadsan ka sorkar Meghalaya bad ka sorkar Assam kin shim jingkitkhlieh ban ai ka jingshngain ia ki kali kiba iaid na Assam sha Meghalaya bad kiba sah ruh kumjuh.