Shillong: Ka dorbar shnong Nongrim Hills kam sngew iahap ia ka jingkren u CEM ka KHADC bah Winston Tony Lyngdoh halor ka jingkyntait ban ai NoC ia ka kompeni Blinkit, kaba dei ka kompeni ban leit rah marbam online.
Haba kren mynta ka sngi, u Rangbah Shnong ka Nongrim Hills bah Bantylli Nari ula ong ba ka dorbar shnong ha kaba nyngkong ka la ai ia ka No Objection Certificate (NoC) sha ka kong Banita Kurbah bad ka la wan shim ia ka NOC bad u lok jongka, uba dei u dkhot ka VPP, hynrei kham hadien ka la pynphai biang noh namar ba ka la ong ba kam iatreikam shuh bad ka Blinkit.
Hadien kane ka dorbar shnong ka la ai noh ia ka NOC ha ka kompeni M/S SSO kaba long director u bah Meban Nongsiej.
U bah Bantylli ula ong ba ka Executive Committee ka dorbar shnong ka la sngew dei ban ai NoC hadien ba la iohi ia ka jingkren u CEM bah Tony Winston uba la ai NoC ia ka jaka ieng kali ha Dhakheti kaba la ialeh lang u Khasi bad u bar jylla.
U la ong ba ka jingkren u CEM ba kan ktah ia ki 4000 ki dukan, ula buh jingkylli hap ban tip, katno tylli kiba dei jong ki Khasi na kine ki 4 hajar namar ba ha Shillong, don kumba 6 lak ngut eiei ki nongshong shnong, bad na kine, 4 lak ngut kiba la kham biang ka kamai kajih bad kumba 2 lak ngut pat kiba shu bam ja rwing, mut kamai mynstep bam janmiet.
Ula ong ba ki marbam kiba leit rah ka Blinkit ka ai duna dor haduh 20 percent kaban iarap ia kiba duna ka ioh ka kamai.
Dang shen, u CEM ka KHADC ula ong ba ha kawei ka lad pathai khubor ba ka KHADC kam ai trading license ia ka Blinkit namar ba kan pynduh jai a kumba 4 hajar ki dukan marbam ki trai muluk.
Ha kajuh ka por, u Bah Nari u la pynpaw ïa ka jingkylli ba balei ka KHADC ka dang ai Trading Licence ïa ki rynsan die mar online kum ka Amazon, Flipkart bad kiwei pat haduh mynta, hynrei haba wan sha ka Blinkit pat ka ai daw kumwei.
Hato ka KHADC ka la wad bniah, ki 4000 ki dukan kumba ong u CEM, ki dei Jongno?: Nongrim Hills
