Shillong: Ka Special Intensive Revision (SIR) 2026 ka la sdang naduh ka 30 tarik u Jylliew bad kan kut haduh ka 29 tarik u Naitung, kaban long shi bnai kynthih.
Ha kane ka jingpynrung kyrteng kyrpang, kiba dei hok kin ym shah kyntait hynrei ki bym dei hok ki nongshong shnong kin shah kyntait ha ka thup thep nongthep vote.
U Chief Electoral Officer ka Jylla u Dr. BDR Tiwari, haba kren sha ki lad pathai khubor mynta ka sngi u la ong ba ki BLO ki la sdang ïa ka jingleit rung sha ki thliew iing briew ban sam ïa ki Enumeration Form (EF) sha ki paidbah ha kylleng ka jylla naduh ka 30 tarik u Jylliew.
Haduh mynta la sam 1.19 lak tylli ki form lyngba ki 3,551 ngut ki BLO ha jylla Meghalaya. La thung ruh 60 ngut ki Electoral Registration Officer (ERO), 166 ngut ki Assistant Electoral Registration Officer (AERO) bad 410 ngut ki BLO Supervisor ban peit bad pynïaid ïa ka jingtrei paidbah.
Ka Meghalaya ka don 23,49,645 ngut ki nongthep vote, bad uwei pa uwei u BLO u peit kumba 662 ngut ki nongthep vote.
U CEO u la pyntip ba ym donkam satia ban pynbiang kino kino ki kot jingpynshisha ha ka por ba pyndap ïa ka Enumeration Form. Lada ka ïing ka khang, u BLO un buh ïa ka Form bad un wanphai haduh lai sien ban lum biang ïa ka.
Ki nongthep vote ki lah ruh ban pyndap bad phah ïa ka Form lyngba ka ECINET mobile application lane lyngba ka Voter Services Portal ha ka por jong ka Enumeration Phase.
Kito kiba la wan shong shnong ha Meghalaya hadien u snem 2005 na kiwei pat ki jylla, ki lah ban wad ïa ki jingtip jong ki lyngba ka Voter Services Portal ne ka ECINET App bad pyndonkam ïa ki jingtip ba don ha ka Electoral Roll jong ka jylla ba ki wan na ka bynta ban pyndap ïa ka Form.
U bym dei hok, yn shah weng na ka thup thep vote| la iaid ka jingsam form sha ka 1.9 lak tyllia
