Shillong: Ka bor district ka East Khasi Hills kan pyntreikam ia ka Special Intensive Revision (SIR) ne ka jingpynthymmai ia ka thup kyrteng nongthep vote kaba kyrpang naduh lashai ka sngi ka 30 tarik Jylliew kaban neh shi bnai kynthih.
Ha kane ka SIR, ki Booth Level Officers ne ki BLOs, kin leit ban sam form sha man ki thliew ïing ha ki 1021 tylli ki polling station ha ka district kaba don 17 tylli ki konstitwensi MLA ban pyndap ia ki kyrteng nongthep vote. Ha kane ka jingsienjam, ki BL kin sam ia ka form ba la pyndap lypa sha ki nongthep vote kiba la don lypa ia ki kyrteng jongki naduh 2005 bad haduh 2025.
U Additional Deputy Commissioner ka East Khasi Hills bah Ronnie Wahlang ula ong ba kito ki bym pyndap ia ka form, kin jah kyrteng bad kin ym ioh thep vote syndon.
Ka thup nongthep vote kan mih ha ka 7 tarik Risaw mynta u snem. Ha kane ka SIR, kito ki bym dei hok ki nongshong shnong, kin shah weng noh na ka thup nongthep.
Katkum ka Election Commission of India (ECI), ki don 11 tylli ki kot ki sla kiba donkam ban submit ban pynshisha ban ioh rung kum ki nongthep vote.
La pynthikna ba la bthah ia ki BLO ba kin pdiang ia baroh ki kot ki sla kiba iadei bad u nongthep kum ki syrnod kiba ai ki Balang, ki Rangbah Shnong bad kiwei kiwei bad u Electoral Registration Officer un sa bishar katkum ki kot ki sla.
La kyntu ia ki paidbah ban iashim bynta pura khlem kano kano ka jingartatien.
Kiba kwah jingtip ki lah ruh ban phon ha u number ka Election Commission-1950.
Ki 12 tylli ki kot ki sla kiba la buh ka Election Commission kiba dei ban pynbiang ki dei
1. ka Identity card/Pension Payment Order jong ka sorkar pdeng/Sorkar jylla/PSU.
2. Ka Identity Card/Certificate/kaba ai ka sorkar India India,/bor sorkar /Banks/Post Office/LIC/PSUs shwa ka 01.07.1987.
3. Ka Birth Certificate.
4. Passport
5. Ka Certificate ba pass Matric ne jingpule na ki Boards/universities
6. Ka certificate shong nongshong shnong ba la ioh na ki bor sorkar jylla
7. Ka Certificate long trai ia ka khlaw ne Forest Right Certificate
8. Ka certificate OBC/SC/ST
9. Ka National Register of Citizens
10. Ka Family Register ba la leh ki bor sorkar.
11. Ka Certificate jaka ba la pynshisha ki bor sorkar
12. U Aadhaar Card tangba tang ban tip ia u briew, ym kum u nongshong shnong.
Ki bym pyndap form, kin duh thep vote | Shi bnai yn leit rung ïing ki BLO
