Shillong: Ka Meghalaya Administrative Training Institute (MATI) kala pyllong ia ka jingialang kaba nyngkong halor ka phang pdeng, ‘Ka jingphaidien’ ha ka 12 tarik Jylliew 2026 ha Vivanta, Shillong ha ka jingdon lang u bah Donald. P. Wahlang, IAS (Retd.), Chairman, Meghalaya State Food Commission, uba la long kum u kongsan.
Haba kren ha kane ka jingialang, u bah Donald.P. Wahlang ula iasam ia ka jingshem jongu bad ka jingiohi halor ka jingai jinghikai bad ka jingshah pyntbit ha kaba iadei bad ka kam synshar paidbah. Ula ban jur ba ka jingai jinghikai ka dei ban phaikhmat ban pynsuk ia ka rukom synshar bad pyniaid kam paidbah, ban pynbha ia ka rukom shakri bad ban long kaba wanrah ruh ia ka jingmyntoi kaba don jingmut sha ki paidbah lyngba ki ophisar.
Ula ong ba ka bynta jong ka MATI ka long ban pynkhlain ia ka jingtbit bad ban kyntiew ia ka jingtip kaba iai bteng hapdeng ki nongtrei sorkar ha ka jylla bad ban don ka jingiatreilang kaban wanrah ia ka jingiajan haba ai ka jingshakri ia ki paidbah.
Ha kajuh ka por, ula ong ba ka donkam ban sdang ia ka MATI Tura Centre ban ai ka jinghikai ia ki shakri sorkar ha ka thain Garo Hills ban lait na ka jingbam por bad kiwei ki jingeh.
Ha kane ka jingialang, u bah Donald.P. Wahlang ula pyllait ruh ia ka Annual Training Calendar bad ka Capacity Building Plan (CBP) jong 47 tylli ki Department ka sorkar Meghalaya kaba iadei bad ka Mission Karmayogi ka sorkar India.
Ula pyllait ruh ia ka Digital Locker Facility, kaba la wanrah da ka MATI na ka bynta ban pyllang ia ki syrnod kiba la pyndep ia ka jingshah hikai.
Ha kane ka jingialang, la shim bynta lang ruh ka Chandralekha Mukherjee, Principal Adviser, Capacity Building Commission, ka sorkar India lyngba ka online, kaba la kren halor ka Mission Karmayogi bad ka iGOT kaba iadei ka jingai jinghikai ia ki ophisar ha ka ri. Ka la iaroh ia ka jylla Meghalaya kaba la paw kum kawei napdeng kiba tbit ban pyntreikam ia ka Mission Karmayogi khamtam hapdeng ki jylla ha North East.
Ha ka prokram, la ioh ruh ia ka jingkren na u Director General, MATI, uba la batai ia ka thong ban pyllong ia ka MATI kum ka shlem ka Centre of Excellence ha ka jingai jinghikai, ka jingwad bniah bad ka jingpyntbit.
U Dr. Bijoy A Sangma, u dkhot jong ka Meghalaya Consumer Disputes Redressal Commission ula wan ban iashim bynta kum u nongkren ba kyrpang uba la iasam ia ka jingshem jong u ha kaba iadei bad ka jingai jinghikai, ka jingpyntbit ialade bad ka jingpynhap katkum ka jingtyllun ka por.
Shi bynta jong ka jingialang, la ai khusnam ruh sha ki 12 ngut ki nonghikai ne Resource Persons kiba la noh synniang ha ki jinghikai kiba la pyniaid da ka MATI. La pynkup burom ruh ia ki 10 ngut kiba ioh ia ka iGOT hapoh ka Mission Karmayogi na ki tnad bapher bapher.