Shillong: Ka United Democratic Party (UDP) ka la don ha ka jingkynrum kynram kaba jur hapoh ka iing jongka hadien ba shibun bah ki nongialam kiba rim, kiba rangbah kila mih noh na kane ka party ha kine ki sngi ba la dep.
U MLA ka UDP uba dei ruh u Working President u bah Paul Lyngdoh um kwah ban batai shai ia ki daw halor kane hynrei ula kdew ba ki nongialam kiba rangbah kum u bah Bindo M. Lanong, u Samuel Sangma, u Dr. Jemino Mawthoh, bah Lambor Malngiang, bah Robertjune Kharjahrin, u Dr. Aman Warr, ki krad lut na kane ka party.
U bah Paul ula ong ba ki paidbah ki dei ban wad ia ka daw halor kane ka jingphet noh ki nongialam na ka party, kiba ju don bynta bad aiti met bad mynsiem ban kyntiew ia ka party.
Lah ban kdew ba u bah Paul ula pynpaw ia ka jingbynniaw ha ki sngi kiba la dep halor ka rukom pynhap myntri ia u bad ia u bah Kyrmen Shylla, ban pynmih bujli da u bah Metbah Lyngdoh bad bah Lahkmen Rymbui.
Ka jingphet lut ki nongialam na UDP, ki paidbah kin wad ia ki daw, ong bah Paul
