Shillong: U President ka NPP Meghalaya uba dei ruh u symbud myntri rangbah ka jylla u bah Prestone Tynsong ula ong ba u Dr. DRL Nonglait un long u simpah simsong ban iathir iatai ia ki mat ki jura bad ki skhim bapher bapher jong ka sorkar India na ka bynta jingmyntoi ki paidbah ka jylla.
Haba kren ha ka jingialang ialap elekshon ka NPP ia u Dr. DRL Nonglait ha Mylliem Maweitnai ha janmiet sngi Palei, u bah Prestone ula ong ba u Dr. DRL Nonglait un long ruh u shrieh jrong kti, ban leit wad ia ki skhim, ia ka pisa na ka bynta ki paidbah ka ri Khasi-Jaintia.
Haba kynthah ia kiwei, u bah Prestone ula ong ba don ki paralok kiba shu ong ba katne une ym long shuh ba la sngew hun sngew bang katba kren hynrei ka kam pat 6 bnai ruh ym don eiei, shi snem ruh ym don eiei ar snem ruh ym iohi eiei katba ka jingkren kaba shoh mynsiem ym long shuh. Kane ka long ka bym don jingmut haba shu long tang ha suin hynrei dei ha madan na ka bynta ka jingmyntoi ki paidbah.
U la ong ba lada jop u Dr. DRL Nonglait un don beit ha Delhi la kumno kumno 15 sngi ha ka shi bnai ban buddien ia ki kam ki jam jong ka jylla.
Ula ong ruh ba u Dr. DRL Nonglait un long kum u riew khraw ka jaitbynriew u Prof. GG Swells bam kwai ha Duwar u Blei uba la tynshain ha Parliament.
U Dr. DRL Nonglait un long u shrieh ba jrong kti, u simpah simsong ha Delhi, ong bah Prestone
