Shillong:Ka Ramakrishna Mission Vivekananda Cultural Centre ka la rakhe ia ka Sngi Seng jong ka mynta ka sngi, kaba rakhe ia ka jingdap 125 snem jong ka jingwan u Swami Vivekananda sha nongbah Shillong. Ban pyndap ia ka jingwan jong ki samla pule kiba bun haduh 1,800 ngut, ia kane ka jingrakhe kynmaw burom la pynlong ha ki artylli ki jingialang ha ka jaka pule jong ka ha Quinton Road .
Ka Jingialang ha ka por Mynstep: Ka Jingburom ia ka Jingtbit bad ka Pateng
Ia ka jingialang ha ka por mynstep la sdang ha ka por 10:00 baje da kaba pynmeh ia ka sharak da ki nongshah khot kyrpang bad ki kynrem ki lyndan.
U Kongsan, Justice ba don burom Bah Hamarsan Singh Thangkhiew, Meghalaya High Court, u la pynpaw ïa ka burom kaba khraw ïa u Swami Vivekananda ha ka jingai jingkren maitphang jong u. U la ïaroh ïa ka bynta ba kongsan jong ka Ramakrishna Mission Vivekananda Cultural Centre ha ka jingpyrshang ba radbah jong ka ban ai ka jingshakri ïa ki samla lyngba ki rynsan ai jinghikai bad pyni kolshor bapher bapher.
U Symbud Kongsan ba don burom u Swami Vedaswarupanandaji Maharaj, uba mihkhmat ïa ka Ramakrishna Mission Institute of Culture, Golpark, Kolkata, u la ai ka jingkren kaba ai mynsiem ha kane ka jingïalang. U la kyntu ia ki samla ba kin pynleit jingmut ha ka thoh ka tar bad ki jinghikai jong u Swami Vivekananda ban ioh ia ka bor bad ka jingpynshlur kaba donkam ban jop ha baroh ki liang jong ka jingim.
U Swami Hitakamananda uba dei u Secretary jong ka Ramakrishna Mission Shillong u la ai ia ka jingkren pdiang burom. U la pynkynmaw biang ïa ki jinghikai jong u Swami Vivekananda halor ka Niam, da kaba ban jur ba ka jingpdiang ïa baroh ki jingngeit kum ki lynti kiba ryntih ka ïalam sha kajuh ka thong ba kynja mynsiem.
Jingpynkup burom ia ki nongjop jong ka Meghalaya
Ka Mission ka la ai jingithuh ruh ia lai ngut ki riew pawkhmat na ka jylla Meghalaya kiba la wanrah burom ia ka ri.
• U Bah Hally War: Kum ka jingai khublei ïa ka jingtrei kaba palat 50 snem ha ka rep ka riang bad ka jingpynneh pynsah ïa ki jingkieng jri jong ka jylla.
• Ka samla Rifiness Warjri: Kum ka jingithuh ïa ka ba ka la long ka briew kaba dang khynnah tam na Meghalaya ban kiew ïa u lum ba jrong tam ha ka pyrthei, u lum Everest.
• U Bah Risingbor Kurkalang: Na ka bynta ki jingnohsynniang ba kongsan jong u ha ka kam saindur tynrai.
Ka Jingialang ha ka por nohphaisngi: Ka Jingpynkup bor bad ka “Vikasit Bharat”
Ha ka jingialang kaba ar la wan ban iashim bynta da u Bah D.P. Wahlang, IAS (Chief Secretary barim sha ka Sorkar Meghalaya), kum u Kongsan. U Bah Wahlang u la ai mynsiem ia ki samla da ka jingkyntu jong u Vivekananda: “To khie bad to sangeh haduh ban da poi sha ka thong.” U la ban jur ia ka jingdonkam jong ka jingim kaba skhem jingmut, da kaba kyntu ia ki samla pule ban pyndonkam lai tylli ki “filter” ha ka jingim jong ki: ban tehlakam ia ka jingkren, ban sngap tang ia ki khubor kiba bha, bad ban leh ia ki kam kiba bha katba ki dang kyntait ia ki jingsniew.
U Dr. Amulya Kumar Mohanty, Director of ICAR-ATARI, u la plie ia ka jingialang kum u symbud kongsan. U la pynshlur ia ki samla ban ialam ia ki jingpynkylla ha ka ioh ka kot jong ka India bad buh ia ki thong shimet ban iarap ban pynurlong ia ka jingthmu jong ka Vikasit Bharat.
Ka Vivekananda Award of Excellence
Ka bynta ba kongsan ha kane ka sngi kadei ka jingai ia ka khusnam Vivekananda Award of Excellence sha u Saurabh Kumar Thapa. U nonghikai uba aiti lut ha katei ka jaka pule, u Thapa u la ioh ia ka jingithuh na ka bynta ka jingnoh synniang ba radbah sha ka Cultural Centre. La ai ia ka jingthoh bad ka song tyngka.
Ki bynta jong ka thoh ka tar bad ka Kolshor
La kot ia ka mawjam kaba kongsan ha ka thoh ka tar lyngba ka jingpyllait ia ka magazine ha ki lai tylli ki ktien “Ka Jingshai – The Light – Jyoti ” da u Kongsan. Ka kot ka don ia ki jingthoh ha ka ktien Khasi, Phareng, bad Hindi, kaba pyni ia ka nongrim jong ka Mission kaba ai bynta lang ia baroh.
Baroh ar tylli ki jingïalang ki la kut noh da ki prokram kolshor kiba iphuh iphieng kiba pyni ïa ka pateng ba riewspah jong ka India, da kaba pynleit jingmut kyrpang ha ki riti dustur ba kyrpang jong ka thaiñ shatei lammihngi jong ka India. Ha kane ka jingïalang la wan iashim bynta lang da ki 1,800 ngut ki samla pule, kaba kyntiew ïa ka jingai mynsiem bad ka jingsngew sarong ïa la ka ri.
Rakhe ka Ramakrishna Mission Shillong ia ka Foundation Day ban kynmaw burom ia ka jingdap 125 snem ka jingwan u Swami Vivekananda sha nongbah Shillong
