Shillong: Ban pynpaw ia ka jingpyrshah ia ka jingtreikam ka kompeni ia ka surok Shillong-Pynursla-Dawki kaba la wanrah ia ka jingduh bun ki mynsiem briew bad kumjuh ia ka sorkar, uwei na ki rangbah ka thain riwar Pynursla u bah Edmund Khongngai ula khot ia ki paidbah ban iamih paidbah ha ka 29 tarik mynta u bnai Iaiong, 2026 por 12:30 pm.
Haba kren ha ka video kaba ula pyllait mynta ka sngi, u bah Edmund ula ong ba kane ka jingiakhih kan long ha Mini Secretariat ha Pynursla bad ula kyntu ia ki paidbah ban wan iashim bynta ryngkat ki plakad ban pyni ia ka jinglong tylli ka thain.
“Nga la shim ia ka rai shimet, kum u samla uba ju trei na ka bynta ka thain, bad kyrpad ia ki paidbah ka thain ba kin iamih paidbah lang ban pyni ia ka jingiatylli”, la ong bah Edmund.
Lah ban kdew ba dang shen ha ka 20 tarik mynta u bnai, 2 ngut ki briew kila khlad ha ka jingshah ban ka Bolero Pickup ha ka twa ha Mawlieh ha ka jaka ba ka kompeni ka dang tih surok.
Na kane ka daw, u SDO Pynursla ula pynbna ban khang shwa ban iaid kali narum Laitlyngkot sha Pynursla kaba dang iaid haduh mynta namar ba ka kompeni ka dang mait shwa ia ki lum bad ki maw kiba shong synjor kiba buh jingma ia ka leit ka wan.
Khot u bah Edmund ia ka jingiakhih paidbah ha Pynursla na ka jingduh ki mynsiem briew na ka jingtih surok
