Shillong: Ka thain Mynsang hapoh ka Mawkynrew Block ka dei kawei kaba don khappud bad ka West Jaintia Hills ha kaba ka wah Umngot ka long kum u mawpud hapdeng kine ki ar tylli ki districts.
Na ka jingsniew bad jngai ban wan sha Shillong, bunsien ki briew na thain Mynsang ki hap ban leit shim dawai, leit donkam sha Jowai da kaba iaid kjat sha Sohmynting ban poi sha Jowai kaba shim por katto katne kynta.
Ka jingsniew tasam ka surok na Mawkynrew sha Mynsang ka la pynsohsat ia ki briew katei ka thain ha ka leit ka wan, ka kit ka bah, ka khaii pateng bad kynthup ka kam jngohkai kaba la pynngiah ia ki briew ban leit sha katei ka thain watla ka don shibun ki jingitynnad ka mariang.
U chairman Dorbar Ki 18 Shnong Jatah Area u bah Pynskhem Mukhim ula ong ba ka jingtrei ban siang rong ia ka surok na Mawkynrew sha Mynsang ka long kaba suki palat kum ka mattah bad ula byrthen ba lada u kontraktor u dang pynslem ia ka kam, kim banse ban shim da kiwei ki sienjam.
Ha kajuh la iathuh ruh ba la ai jingthoh sha ka sorkar ban pyniasoh ia ka thain Mawkynrew lyngba ka Ksanrngi, East Khasi Hills District sha ka Sohmynting ka West Jaintia Hills ban kyntiew ia katei ka thain, namar lada ka biang ka surok khlem pep kan kyntiew ia ka kam jngohkai bad ka rep ka riang jong ki briew katei ka thain.
Ula iathuh ba ki briew na katei ka thain ki ju iaid kjat ban leit shim dawai bad kiwei ki kam sha Sohmynting ban poi ha Jowai bad lada ioh da ka surok, kan long ka jingkyrkhu ia katei ka thain.
Da ki kjat da ki kynta leit shim dawai ki briew na Mynsang ka EKH sha Sohmynting ka WJH
