Shillong: Katba kiwei ki iapyrshah da kaba pyni bun ki daw ia ka jingpynkhreh ka sorkar ban tei ia ka hotel rem dor ha Umiam, uwei na ki riew Rangbah uba dei ruh u Social Activist u bah Disparsing Rani, ula pynpaw ba u ai ka jingkyrshan ia ka jingwan ka Taj projek ha u Lumpongdeng,Umiam.
U bah Disparsing Rani, ula ong ba ka jingwan kane ka projek kadei ka jingkyrkhu ia ka jylla Meghalaya bad kan long ruh ka lad iohkam iohjam ia kiba bun ki briew ka jylla, namar ba haduh mynta ym pat don ki nongbei pisa kiba shim ia ka jingsngew ba don ka jingiohnong ban pyllut ha kano kano ka jaka.
Ha kajuh ka por, ula kynthoh ruh halor ka jingkren jong kiba bun ba kane ka Lumpongdeng kan kylla sha ka Spa ne ka jaka khem met.
Ula ong ba ha ka jingsngew jong u, ka Spa kadon bun bun jait ki rukom khem naduh ki Chinese, ki Indian. Hynrei ka jingkhem kam mut ban poi sha uta u pud ban wanrah sha ka kam awria.
Ha ka jingsngew jong u ban ong ba kata ka Spa kan ialam sha ka kam awria, ka long ka bym iahap bad ka bym lah ban pdiang hakhmat ka ain namar ka kam awria ym pat ithuh da ka ain bad ka dei tang ka jingkynnoh ki bym pat sngewthuh ia ka lynti haba iadei bad kane ka Spa.
Haba iadei bad ka jingsngewkhia jong kiba bun ba ka jingwan kane ka projek ka lah ban ktah ia ka jingkhuid ka mei mariang, u bah Disparsing ula ong ba kane ka projek kam dei ka karkhana hynrei kadei ka projek kaban iarap ban kyntiew ia ka ioh ka kot ha ka kam jngohkai bad kan ym don ka jingpynjaboh ia ka mariang bad ki rukom shna ki wan ha kata ka rukom ban pynneh ia ka mariang bad kin ym pynduh ia ki dieng ki siej, ki sawdong sawkun ka jaka.
Ka jingioh kam ruh kan sa long da ki 3-4 lak ngut lyngba kane ka projek.
Halor ka jingkren u Symbud Myntri Rangbah ka jylla u bah Prestone Tynsong ba kan ym don ka jingpom ia ki dieng ki siej, ula ong ba kane ka long ka bym lah ban pdiang namar ym lah lait hi bad kan don hi ki dieng ba hap pom tangba hap ban thung pat khambun.
Ka projek ha Lumpongdeng ka jingkyrkhu, ka jaka khem met kam ialam sha kam awria :Ddisparsing
