Shillong: Jin haduh 34 ngut ki briew kiba don bynta ha ka kam khaïi met kila shah kem ha ki pulit ha ka jingkyndang kaba la pyllong la ar sien ha kane ka taiew ba la dep bad hynnin ka miet sngi Saitjain ha ka thain Khyndai Lad.
Ha ka taiew kaba la dep, ki pulit kila kem 18 ngut kynthup 16 ngut kiba die met bad 2 ngut ki ksiang katba hynnin ka miet sngi Saitjain, kila kem 16 ngut kiba die met na ka thain Khyndai lad, IGP Point, nangta ha ka syndah ka Assembly barim.
Ia kane ka jingkyndang kaba la pyllong ha ka por 11:30pm la ialam u Additional SP Traffic u Lovish Garg IPS, ryngkat u SDPO Pyrursla u B . Wanswet MPS bad kiwei ki heh pulit. Kane ka jingkyndang ki pulit, ka long hadien ba la ioh pdiang ia ka jingujor na ki paidbah ia kane ka kam, kaba isaitmet khait ia kiba iaid ba ieng ha katei ka thain tang shu la kham miet.
Ha ka kyrwoh u SP ka East Khasi Hills bah Vivek Syiem ula ong ba ki pulit kila iohi bad lap ba kine kiba die met, kila ai dak ai lain ia ki briew ne ki customer ban pah ban phon ha kane ka kam, da kaba ki leit ban tyrwa dor ia ki briew kiba iaid ba ieng. Kane ka la ktah jur ia ka jinglong kyntang bad ka la pynisaitmet ia ki briew kiba iaid ba kiba ieng.
Halor kane, ki la pynngat ia kine kiba shah kem ha ka kyndon kaba 110 jong ka Meghalaya Police Act.
Ar sien kyndang, kem ki pulit 34 ngut ki nongdie met na thain Khyndai Lad
