Shillong: Ha ka sngi Baar, ki MDC ka liangpyrshah ha KHADC mynta kila kynduh ia u CEM bah Winstone Tony Lyngdoh halor ka shah sospen u Secretary ka Executive u bah. DG Syiemiong.
Ha kane ka jingkynduh, u CEM ula pynshai ha ki MDC ba ka jingsospen ia u Secretary ka dei namar ka jingleh bakla kaba jur bha da kaba iaid lait khlem jingtip u CEM ne u EM. Ia kane la iathuh u Nongialam Liangpyrshah u bah Titosstarwell Chyne hadien ba la iakynduh ia u CEM.
U bah Titos ula ong ba u CEM ula ong ba ka kam kaba la leh bakla u Secretary ka dei kaba jur kaba khia bha bad dei halor kane ba ka Executive Committee ka la sospon noh ia u.
Halor ka jingrisain noh u nongiasaid ain ka Council u bah TT Diengdoh bad ka jingthung bujli ka EC da u bar jylla u bah Titos ula ong ba ha ka jingiakynduh u CEM ula pynshai ba ka jingiehnoh ne risain u standing counsel ka Council u bah TT Diengdoh ka dei na ka daw shimet bad kam don eiei kaba iadei bad ki kam mukotduma ka Council.
Hynrei na ka liang ki MDC ka liangpyrshah ki la pynpaw ia ka jingsngew bynniaw namar ba ka EC kala thung bujli da u bar jylla ban long u standing counsel. U Bah Titoss ula iathuh ba u CEM ula pynshai ba ka jingthung shipor ia u bym dei Khasi, ka dei namar ba duna palat ki riew said sain Khasi bad kin sa bishar biang hadien ia kane.
U Secretary ula leh kaba bakla, u Standing Counsel u la risain hi, ong u CEM ha ki MDC
