Shillong: Tang um leit iarap ia u ban iarap sait ia ka syntex bad ban wanrah ia u borti um bad u brut ban shut Syntex, ka la pyllong ia u para marjan ban pyniap ia u heprit 7 snem ha Nongrah, Shillong.
Ia kane la iathuh u Superintendent of Police (SP) ka East Khasi Hills bah Vivek Syiem mynta ka sngi, hadien ba ki pulit kila kem ia une u briew uba dei u para ba sah marjan bad u heprit.
La san bnai kynthih ba u heprit Kyrshanbor Kharmudai 7 snem ka rta na Nongrah, Shillong, ula jah ha ka 8 tarik Risaw mynshem bad la lap ia ka met iap jongu na khlaw Lum Rumnong ha Mawpat.
U SP u la ong ba une u briew uba kyrteng u Kennedy Khongsti, 32 snem, u la pyniap ia u heprit da kaba set na shyntur bad na khmut bad hadien ba u la iap, u sa thep ia u ha syntex bad u sa thep ha byrni bad sa leit bret sha khlaw ha Mawpat da ka scoty u para ar kmie jongu.
La iathuh ba u hept Kyrshanbor u ju leit peit tv ha kane ka iing man ka por namar ba ki iasah marjan.
U SP u la ong ba la kem ia une u briew hadien ba la ioh ia ki sakhi satar kiba khlain.
Ka shim por ia ki pulit ban ioh kem namar ba ki dang wad ia ki sakhi satar kiba biang watla kila suba naduh kham mynshwa. U SP u la ong ba une u briew u dei ruh uba ju leh ia ki kam runar ha kaba ka lok jong u, ka la iathuh ha ki pulit ia kane bad u dei ruh uba shit khlieh.
Katkum ka jingong u SP, ha ka jingshisha, ki pulit kila lap ksai bad shankhmat halor kane ka jingjia naduh kham mynshwa, tangba kim pat lah ban shu leit kem khlem pat biang bha ki sakhi ki satar bad dei hadien ba la biang ki sakhi, ba kila kem syndon ia u.
Pyniap u para marjan ia u heprit 7 snem ha Nongrah da kaba thep ha syntex bad bret sha Mawpat
