Shillong: U bah Lahkmen Rymbui, uba dei u myntri tnad pule puthi ka jylla ula ong ba ki don shibun bah ki bor pyniaid skul kiba kwah ban pdiang ia ka Meghalaya Education Grant (MEG) bad tang khyndiat ki bym treh.
Katkum ka jingong u myntri, ka sorkar ka dang pynkhreh shaid shaid ia kane ka kam, hynrei kam long kaba suk ban pyndep noh mardor namar ba ka dei kaba iar bad kaba khia haduh katta katta.
Ka MEG ka dei ka sienjam ba ka sorkar ka la wanrah ban shimti noh ia ki skul bym dei sorkar hapoh ka jingpeit ka sorkar bad kumba ka long mynta, ka sorkar ka la pan jingbit na ki bor pyniaid skul halor kane.
U myntri ula ong ba ka jinglong ka skul ha Meghalaya ka long kaba jyrthiaw bha ha kaba ki don shibun ki skul ha ki kyrdan bapher bapher bad ka jingpyniaid.
Ha kajuh ka por, u la ong ba ka sorkar ka dang iakhun tyngeh ban pynryntih ia ki skul khamtam ki skul SSA namar ba ki don kiba duna khynnah bad don kiba la bun palat bad kan pyniakap marbiang khnang ban pyllait na ka jingeh.
Shibun kiba kwah, tang khyndiat ki bym kwah ia ka MEG, ong bah Lahkmen
