SHILLONG: Ka Khasi Students’ Union (KSU) ka la ther tyngeh ia ki riew sainpyrthei (politicians) kiba bang bad thiang tang ka ktien ha ka por election khlem lah pat ban pynurlong ia ka kam kumba ki la khlei.
U General Secretary ka KSU, u samla Donald V Thabah u la ong ba kane kam long shuh kaba thymmai, da kaba ai nam ruh ia ki katto katne ngut ki nongialam kiba la trei shisha ia ka kam na ka bynta ka jaidbynriew, kum u Bah Martin N Majaw uba la wanrah ia ka aiñ bat khyndew bad katto katne ngut kiba dei shisha ki nongialam.
U la ong ba ha kine ki por ba mynta ki politician ki thiang tang ka ktien lada ki kren ha ki jingïalang paidbah, ki kren ieid jaidbynriew, pynban ynda ki la jop bad shong ha ka shuki kaei kaba ki la leh.
U la ong ba ki paidbah kim dei shuh ban kylli, namar ki la iohi ba haduh mynta kim pat leh eiei ban pyni ba ka jaidbynriew kan shong shngaiñ, khamtam ban weng ia ki mynder ri kiba wan buhai shnong ha kane ka jylla.