Shillong: Ki kontraktor hapoh ka shatri jong ka Khasi Jaiñtia Government Contractor and Supplier Association ki la bitar jur ia kane ka sorkar MDA halor ka jingbym lah ban pyllait noh ia ka bill jongki, kaba la kot spah klur.
Mynta ka sngi, ki kontraktor kila iakynduh ia u Chief Engineer (CE) ka Tnad Public Health Engineering (PHE) da ka jingkyrmen ban ioh khubor kaba kmen hynrei kumba shet plak, ki la ioh pynban ka khubor kaba kthang.
U Vice President ka seng, Bah J.T.S. Thongni, u la ong ba hadien ba ki la ïohi ïa ki khubor ba u Myntri ka PHE u la pyntip ba ka Sorkar ka la ïoh palat T.336 klur na ka Sorkar India jong ka Jal Jeevan Mission (JJM), kila kmen ban ioh ia ka bai trei kaba la dep hynrei ha ka jingkynduh ïa u Chief Engineer ka PHE, ki ioh ia ka jubab kaba kthang ngak.
Katkum ka jingiathuh ki kontraktor, ka ram ba ka sorkar ka dei ban siew sha ki kontraktor na ka skhim JJM ka la kot sha kumba T.900 klur eiei.
U Bah Thongni u la ong ba ki kontraktor ki la sngewlyngngoh bad sngew diaw namar ka jubab jong u Chief Engineer kam shai bad ka jingpynshai ka long kumba kren kyllain bun jait, kaba pynlong ïa ki kontraktor ban ym sngewthuh shai ïa ka por bad ka rukom ba kin ïoh ïa ka jingsiew.
Kane ka jingpynshai ka la pynlyngngoh ïa ki kontraktor, namar ba ki la khmih lynti ba ka pisa ba la ïoh na ka JJM kan ïarap ban siew ïa ki bill kiba dang sah, kiba katkum ka seng, ki kot sha ki spah klur tyngka.
U la pynpaw ruh ba ki kontraktor ki la dep ban pyndep ïa ki kamram jong ki, khamtam ha kaba pynpoi um sha ki paidbah lyngba kane ka projek, hynrei haba ki dawa ïa ka bainong kaba dei hok jong ki, ka Sorkar kam pat lah ban pynbeit ïa ka jingsiew.
Ula byrthen ba ki kontraktor kin shim da kiwei pat ki sienjam nangne shakhmat, namar ka jingïakynduh kam ai jinghun eiei ruh em.
Duh Jingshaniah Ki Kontraktor ïa Ka Sorkar MDA| ioh jubab kaba kthang ngak na u CE halor ka T. 300 klur
