Shillong: Ka shnong Lawwahskei ka dang ioh shnong ha 2021 hadien ba la pyniakhlad noh na ka shnong Nginiong. Kane ka shnong ka don ha Hima Myriaw, hapoh Nongstoin Block bad ka Rambrai-Jyrngam konstitwensi jong ka West Khasi Hills.
Ka dei ka shnong kaba kham duna shibun ki kam pynroi bad ka jngai tang kumba 15km na surokbah Shillong-Nongstoin kaba kdat na Umlieh ha ka surok sha Nongriat.
Ka shnong ka don kumba 50 tnum eiei halor u lum ba itynnad ba lah ban iohi shynna baroh sawdong ba la ker da ka mariang ba jyrngam.
Hynrei ban poi sha shnong hap ban iaid kjat namar ba ka surok ka dang dei tang ka surok kumba tan dieng ki muid bad tang ki kali fourwheel ki lah ban iaid khamtam ha ka por lyiur. Ia mynta ka shnong ka dang shna hi ia ka surok na ka skhim 100 sngi bad dang dep tang 330 metre.
Ha ka jingiakren bad u sordar ka shnong bah Elias Syiem, ula iathuh ba ka shnong ka shem jingeh ruh na ka jingbym biang ka um bam nalor ka surok, ka ICDS bad kiwei ki kam pynroi.
La iathuh ba ki briew ha shnong ki hap ban leit tong um na umpohliew ban bah bhar pat sha iing namar ym don um kor sorkar.
Ha ka jingshisha, ka shnong ka don ka lad ban kyntiew ia ka kam jngohkai namar ba ki jaka sawdong ki long kiba itynnad haduh katta katta kiban khring ia ki nongwankai.
‘Ko development shaei pha don, wan kloi’, khot ki nongkyndong
