Shillong: Ki saw ngut ki MLA ka Congress kiba shu phet jyndat na ka Congress kin ym ioh thiah suk satia namar ba ka party ka la kthong tyngeh ia ki lyngba ka lynti jong ka ain.
Saw ngut ki MLA ka Congress kiba kynthup ia u MLA ka Mylliem bah Ronnie V Lyngdoh, MLA ka Umsning Dr. Celestine Lyngdoh, MLA ka Mawhati bah Charles Marngar bad u MLA ka Nongstoin bah Gabriel Wahlang kila phet noh bak na ka Congress sha ka NPP.
Hadien kane, ka Congress ka la buddien bad ka la kthong ba kane ka jingleh jongki, ka long kaba beain bad ka la dawa na ka kashari ba dei ban mait noh ia ka jinglong MLA jongki namar ka jingleit klim jongki sha kawei pat ka party hadien ba la jop ia ka elekshon na ka Congress.
U Secretary ka Meghalaya Pradesh Congress Committee (MPCC) u bah Manuel Badwar bad u bah Kynpham Kharlyngdoh kila ong ba kane ka mukotduma ka la don ha ka High Court, Meghalaya bad ka la shong bishar la kumba san sien bad shen kan sa shong bishar biang.
Ki la ong ba kane ka jingkthong jongki ha ka lynti ka ain, kam mut ba isih ne shun ia ki, hynrei ka dei ban pynieng ia ka hok ba ki MLA kum ki nongmihkhmat paidbah kim dei ban leh kamkai ia ka sur bad ka mon jong u paidbah.
Kthong ka Congress ia ki MLA phet ïing khlem pat dei por sha Kashari
