Shillong: Hadien da ki phew snem ba la jah noh ka jingpyndonkam ia ki kulai ha ka kit ka bah, ka leit ka wan na ka jingmih ki kali, ki surok, ki paidbah khamtam kito kiba dang kham khynnah ki bym pat ju iohi ia ka jingpynmareh kulai, kila ioh ban sakhi biang.
Kane ka long ha madan lynter, ha shnong Mawsadang ka Hima Nongspung, kaba jngai 4 km na shnong Tyrsad, East Khasi Hills.
Ka shnong Mawsadang ka la pyllong ia kane jingiakop pynmareh kulai ka long shi bynta ban pynkhie im ia kaba ju leh mynshwa bad kawei pat ka long ban pynmih pisa na ka bynta ban kyrshan ia ka skul jong ka shnong. Ia kane ka jingpynmareh kulai la pyllong ha madan Lynter ha ka 14 tarik Lber 2026 ha kaba ki paidbah kila sakhi na kylleng ki jaka.
Ha ka jingiakop pynmareh kulai, ia ka nam ba nyngkong la jop u Koh Thup ba la niah da u bah Biendinglang Lyngdoh Marshillong na New Mawjai, West Khasi Hills katba uba wan baar u kulai ba khot kyrteng u Lieh dei khynnah 15 snem u Banjoplang Wanniang na Byrki kaba don ha thain Nongkhnum, West Khasi Hills bad balai u Pynshaibha Nongspung.
Ki don 8 ngut kaba mut 8 tylli ki kulai kiba wan iashim bynta ha kane ka jingiakop pynmareh.
Ki nongiashim bynta ki don ruh na Laitlum bad na kiwei ki jaka.
Rah u Koh Thup na New Mawjai bud u Lieh na Byrki ha ka jingpynmreh kulai ha madan Lynter
