Shillong: Ka Meghalaya High Court ha ka sngi Ba-ar ka la pyndam noh ïa ka jingpynbna ba la pynmih da ka GHADC ha ka 17 tarik Rymphang, kaba pynbna ba ki kyrtong ba ïakhun ïa ka election MDC ki donkam bam don ïa ki syrnot Schedule Tribe.
Haba shong bishar halor kane ka mukotduma ba la mudui da u Enamul Hoque pyrshah ïa ka jingpynbna GHADC, ka High Court ka la rai ban pyndam ïa kane ka jingpynbna namar kam long satia kaba la leh katkum ki kyndon jong ka aiñ.
Na ka liang u nongïaleh pyrshah ïa kane ka rai ka GHADC u la pynpaw ba kum u nongthep vote, kane ka hukum ka GHADC ka long pyrshah ïa ka Assam and Meghalaya Autonomous Districts (Constitution of District Councils) Rules, 1951, ha kaba u la dawa ba dei ban pyndam noh ïa kane ka hukum ka GHADC.
U muktiar ba ïakhun na ka bynta u nongmudui u la ong ba kane ka jingpynbna la leh khlem da bud ïa ki kyndon aiñ bad ki kyndon ka Para 2(6) ka Sixth Schedule nalor ba la kdew ruh ha ka Rule 128 ba uba nongthep vote u lah ban ïashim bynta ha ka election watla um dei u riewlum (Schedule Tribe) laitnoh u bym dei u nongshong shnong ba pura hapoh u pud u sam ka Autonomous Council.
Nalor kane la ong ba ka GHADC ka la ïaid palat ïa ka bor haba pynmih ïa ka hukum ba donkam ban don ïa ka syrnot ST, namar ïa kane ka jingpynbna la leh khlem da ïoh ka jingmynjur na u Lat ka Jylla.
Na ka liang u Muktiar ba ïakhun na ka bynta ka GHADC, u la pynpaw ba ki jaka ba hap jong ki riewlum kum ha Assam, Meghalaya, Tripura bad Mizoram la kylla ka rukom don ki nongshong shnong bad ïa ki hok jong ki trai shnong (Indegenous Tribal) donkam ban ïada, kaba la pynlong ban pynmih ïa ka hukum katkum ka Rule 29 (a) and (b) bad ka Rule 30 ka Assam and Meghalaya Autonomous Districts (Constitution of District Councils) Rules, 1951, kiba pynkupbor ïa ka Executive Committee ban leh ïa kata, ha kaba u la ai nuksa ruh jong kawei ka mukotduma ha kaba ka Para 2(7) ka Sixth Schedule ka aibor ïa ka District Council ban thaw ïa ki kyndon.
Hadien ba la bishar ïa ka jingïasaid na baroh arliang, ka Ïingbishar kaba khlieh da u Justice HS Thangkhiew ka la pynksan ïa u nongmudui, u Enamul Haque uba tynjuh pyrshah ïa ka jingpynbna ba pynmih da u Chief Executive Member (CEM) ka GHADC ha ka 17 tarik Rymphang.
Ka Ïingbishar ka pynpaw ba ka Executive Committee ka la jam palat ïa u pud treikam jong ka bad ka jingpynbna kam lah ban ïaid lait ïa ki jingbishar ain, namar ka jingpynkylla ïa ka hok thep vote ka hap ban ïaid lyngba ka District Council bad ïoh ïa ka jingmynjur na u Lat hapoh ka Rule 72 jong ka Constitution of District Council Rules, 1951.
Ka Ïingbishar ka la pynpaw ba naduh u snem 1952, ki bar jylla kila paw kyrteng bad ki don ruh mynta ha ka thup jong ki dkhot ka GHADC, bad ka jingpynbna ba mih jingkylla ka dei eh kum ka jingtyrwa, bad ka bym don ïa ka jingtyrwa pynkylla ïa ka Rule 8 bad Rule 128, kiba batai ïa ki nongthep vote bad ki kyrtong kiba lah ban ïakhun election.
Pyndam ka High Court ïa ka hukum ka GHADC ban don ST ki kyrtong ba ïakhun MDC
