Shillong: Ka ïing dorbar thawain ka jylla Mizoram, ka la mynjur ia ka ain ha kaba ki kynthei Mizo kiba shongkha bad u bym dei Mizo kin duh ia ka spah hiar pateng bad kumjuh ia ka kyrdan Schedule Tribe (ST).
Kane ka ain la tip kum ka Mizo Marriage and Inheritance of Property (Amendment) Bill, 2026, kaba la iadei bad ka shongkha shongman bad ka spah hiar pateng jong ka jaitbynriew Mizo.
Ha kane ka ain kaba la pynkylla, ki kynthei Mizo kiba shongkha ia ki bym dei Mizo, kin duh noh ia ka jingithuh katkum ka riti dustur kynthup ki khun ki kti, ki ksiew khamtam kiba iadei bad ka spah hiar pateng.
Hynrei kane ka ain kan ithuh tang ia kito kiba shongkha para Mizo lane lada dei u shynrang u dei u Mizo.
Kito ki shah kyntait ha kane ka ain, kin ym ioh ruh ia ka kyrdan Scheduled Tribe.
U myntri rangbah ka jylla Mizoram u Lalduhoma ula ong ba kane ka jingpynkylla ia kane ka ain ka long hadien ba la pyllong ia ka jingiasyllok bad ki kynhun bapher bapher bad ka long ruh ban pyllait na ka jingiatyngkhuh na ka jingkylla ha ka imlang sahlang.
Ki kynthei Mizo kiba iahap shyieng krung bad ki bym dei Mizo, kin duh ia ka spah pateng, kyrdan ST
