Shillong: Hadien ba mih ka report halor ka jingïap jong 2 ngut ha Assam Regimental Centre, Happy Valley na ka jingsuba shah ktah ha u khñiang meningococcal, u Myntri ba khmih ïa ka Koit ka Khiah ha ka Jylla, u Baj Wailadmiki Shylla u la pyntip ba ki briew ba ïakynduh ïa ki arngut la pynshong noh la kajong (quarantine) bad la bishar bniah ïa ka koit ka khiah jong ki, bad na ka liang ka tnat ka la phah ïa ki briew jong ka sha katei ka len shipai ban shim ïa ki lad jingïada.
U Myntri u la pyntip ruh ba 2 ngut kiba khlad ka dei kumba 2 taïew mynshwa bad ym dei ba ki khlad ha kajuh ka por, ha kaba u la kyntu ruh ïa ki paidbah nongshong shnong ba kim dei ban sngewtieng.
U Bah Shylla u la pyntip ruh ba la shim ïa ki nongmuna (samples) jong ki briew ba shah ktah na u khñiang jingpang ban phah pule bniah bad ban tip shai kumno la ïoh ïa u khñiang jingpang, bad hadien ka tnat kan sa bishar ban pynjari ïa ki kyndon (Standard Operating Procedure).
La phah shong kyrpang ïa kiba kynduh bad kiba ngat khñiang meningococal
