Shillong: U MLA ka UDP na West Shillong u bah Paul Lyngdoh ula ong ba u Dr. Ricky AJ Syngkon u dei u briew uba sani bha ban leh ia kano kano ka kam bad kaba kham phylla ka long ba u buh ia ka party shadien, bad ia u paidbah hakhmat.
Haba kren mynta ka sngi, u bah Paul ula pynpaw ia ka jingduh kaba khraw ia ka jingkhlad syndet noh u Dr. Ricky AJ Syngkon namar ba watla u don khyndiat por kum u MP ha Parliament hynrei ula kren shibun ia ki mat ki jura ka jaitbynriew.
Haba pyrto ia ki kam u Dr. Ricky AJ Syngkon, u bah Paul u la ong ba ia ka jingim jong u briew la thew da ka jingjylliew jong ki kam kaba ula leh, ym da ka jingjrong ka rta.
Ka jingduh kaba khraw ia u khun dap shynrang ka jylla, ong u Dr. Mukul
U nongialam ka liangpyrshah u Dr. Mukul Sangma ula pynpaw ia ka jingsngewsih jur halor ka jingkhlad kyndit u MP ka Lok Sabha na Shillong u Dr. Ricky AJ Syngkon.
Haba kren mynta ka sngi, u Dr. Mukul ula ong ba u Dr. Ricky AJ Syngkon u dei u khun dap shynrang ka jylla uba la mihkhmat ban iasaid ia ki paidbah ka jylla bad khamtam ia ka Khasi-Jaintia Hills.
Watla u dei uba dang thymmai ban don ha ka sain pyrthei India hynrei ula pyni ia ka jingtbit bad ka jingshlur ban kren bad ban dawa ia ki jingdonkam jong ki paidbah bad ka jylla.
U Dr. Mukul u la ong ba ki briew kin iai kynmaw ia ki matti ba u Dr. Ricky AJ Syngkon ula leh na ka bynta ki paidbah.
U Dr. Ricky AJ Syngkon u dei uba sani bha, u buh ia ka party shadien, ki paidbah hakhmat: Paul
