Babu Kular Khongjirem.
Lah i danda, ithamula bad i komik hi khait ban peitkai ia ka jingiatainia jong ki nongmihkhmat paidbah jongngi mynnin ka sngi la ka long ha ing dorbar Assembly ne ha ing dorbar District Council.La i kumba kam dei shuh ka dorbar kyntang hynrei ki pynlong ia ka la kum ka iew luri-lura pynban.Ki nongmihkhmat paidbah ba la kham rangbah(senior member) lei lei, i kumba ki leh kum ki khynnah ki khyllung pynban.Ha ka jaka ba kin tem ia ka jingiakren, kine ki senior member ki kylla long pynban kum ki nongai ding ne nong lur phlang ne nongthang prew shuh shuh khnang ban kham meh ne kham khluit shuh shuh ka ding.
Hynrei kaba kham phylla bad artatien eh ki paidbah ka long ba na ka jingkren bad ka jubab u Chief Minister halor ka ILP, imat, ka ILP ka lah ban LIP noh syndon artad hapoh kane ka sorkar MDA I ne MDA II.Ka shai kdar ba ka sorkar Delhi kam suitniew ne kam salia ia kine ki nongialam na Meghalaya.U Chief Minister lem bad ka kynhun Minister jongu ki la phla shai kdar ba ki la leit ia kynduh bunsien ia u Central Home Minister, Amit Shah bad Prime Minister hynrei kim lah pynkohnguh ne pynngeit satia ia ki ban ai ILP ha Meghalaya.Ym tang katta,hynrei u la pynher ruh shibun tylli ki jingthoh ne shithi sha u Modi bad Amit Shah hynrei kim salia,kim burom ,kim niewkor bad kim treh jubab satia kaba shai ia ki. Nalor kata, u la phla ruh ba ka sorkar India ka pyntreikam ha baroh ki para state riewlum jongbka North East ka India kum ka Manipur, Nagaland, Arunachal Pradesh,etc hynrei kam treh ai pat tang ia ka Meghalaya marwei.Kane ka la pyn-i shai kdar ba u Chief Minister ka Meghalaya bad ka kynhun jongu ki la kut ka buit ka bor jongki bad ki la pheil(failed) ruh kum ki nongialam jong ka sorkar Meghalaya hakhmat ka sorkar India.Kat u Chief Minister bad Deputy Chief Minister kiba ialam ia ka sorkar kin sdang ban khynniat pynban ia ka jingkitkhleh(responsibility) sha ki MLA paidbah jong ka Liang Pyrshah ba kin leit ia kynduh noh ma ki ia u Amit Shah bad U Prime Minister Modi sha Delhi. Kane ka la kylla long pynban ka kam biej,ka kam khyllung khynnah bad ka kam kai kat ia ka kambah kam san( burning issues) kaba ktah ia ka iap ka im jong ka jaitbynriew jongngi bad kaba khia thew shi katdei eh hynrei ki lehkai pynban.
Ka jingiatai nia mynnin ka sngi ka pyni bad paw pen ryngkew lut syndon ka jinglong nongialam jongki.Ki paidbah ki nang mut ba ki dei ki nongialam kiba stad bad shemphang shisha,phewse! ki pyni pynban ba ki dei nongialam ba tad dor.kiba khluid biej bad ba la synshar ia ka jingsngew jongki da ka jingdom bad jingsngew bitar pynban ( rule by emotion).Lada kum kine ki jait nongialam kin dang synshar ha ka state jongngi,ka lawei jong ka state bad ka jaitbynriew jongngi kan long lypa kaba dum hadien ha bud.Ki kham pynleit jingmut ia ka roi ka par(development) ban pynsngew bang ia ki paidbah bapli da kaba kob sarong ba ki ai bad pyllut ym shuh da ka hajar klur bad da ki lak spah klur hynrei da ki spah hajar billion syndon khnang ban pynthamme bad pynbiet ia ki paidbah ba lui lui(inocent people) bapli katba ia ki kam ba shisha pat kiba ktah mationg shisha ia ka ri bad ka jaitbynriew kum ka ILP, ka Ktien Khasi ha ka 8th Schedule,etc ki leh klet, kim salia bad kim kheinkor satia.
Ka la dei ka por ia ki paidbah ban bishar bniah ia ki nongialam bad nongmihkhmat jongki.Kumba khluit bad long ki nongialam jongki, kumta ruh kan bud ryngkhi bad bit ruh ha ki Party ba ki ialam ma ki ia ka.Hato,! Dang lah ne em ban pynkhie im biang ia ka jinglong kyntang ka synshar khadar ha kane ka synshar paidbah ha kane ka ri jongngi nangne shakhmat.Ngi ieh ia kane hakhmat ki paidbah ba kin ia bishar bad puson bha.
La pyn-Lip ka sorkar MDA ia ka kam(issue) ILP
