Shillong: Ka India ka la aiti ia ka dulir halor ka jingkieng jri sha ka United Nations Educational, Scientific and Cultural Organization (UNESCO) ban pynrung ha ka thup ka World Heritage ne ka Spah Hyndai ka Pyrthei.
Ia kane ka dulir la aiti u Ambassador ka India sha United Nation Organisation (UNO) u Vishal V.Sharma sha u Director ka UNESCO World Heritage Centre, u Lazare Assomo Eloundou ban kyntu ban pynrung ia kane ka dulir ha ka thup 2026-27 Evaluation Cycle ka UNESCO.
Haba aiti ia kane ka dulir, u Vishal V Sharma ula ai khublei ia u myntri rangbahduh ka ri India u Narendra Modi, u myntri ka lariti ka ri u Gajendra Singh Shekhawat, u myntri rangbah ka Meghalaya u Conrad K Sangma, u Principal Secretary ka Lariti ka Meghalaya bah Frederick Roy Kharkongor, ki briew ka Archaelogical Survey of India, ka tnad korbar ri, ki stad bad ki nongshong shnong ka Meghalaya khamtam kiba sumar ia ki jingkieng jri.
Ki jingkieng jri ki dei ka spah u mynbarim ka ri Khasi-Jaintia kiba la saindur ia ka jingiadei u briew bad ka mei mariang.
Kane ka jingtyrwa ka India ban ithuh ia ki jingkieng jri kum ki spah hyndai ha ka pyrthei ne ka World Heritage List, ka dei ka jingshim khia ka sorkar jylla bad kumjuh ka sorkar India ban pynneh ia ka riti dustur bad ka jingstad tynrai jong ka jaitbynriew Khasi ban pynbna iar sha ka pneh ka pyrthei lyngba ka seng bah ki ri ka pyrthei ka UNO.
Aiti u Ambassador ka India ha UNO sha u heh ka UNESCO ban pynrung ia ki Jingkieng Jri ka Meghalaya ha ka World Heritage
