Shillong: U Bah Hally War na ka shnong Siej kaba don ha nongkyndong ka thain Sohra, Meghalaya u la ioh ia ka khusnam Padma Shri Award 2026 na ka sorkar India na ka bynta ka jingnoh synniang jong u sha ki kam na ka bynta ka imlang sahlang bad ka jingpynneh ia ka mariang, khamtam ha kaba iadei bad ka jingkyntiew ia ki jaka khlaw bad ka jingpynneh ia ki rukom treikam ba tynrai.
Kum u briew uba don ka jingnang jingstad tynrai hynrei u bym pat ioh ia ka jingithuh, u la ioh ia ka khusnam Padma Shri na ka bynta ka jingnoh synniang jong u ban pynneh bad kyntiew ia ki kam kum u enjiniar tynrai ban thain jingkieng jri jong ki jaitbynriew Khasi.
Ula sdang ban thain bad shna jingkieng jri naduh ba u dang 10 snem ka rta ryngkat ka jinghikai u paieid jongu. U la pynneh ia ka rukom treikam kaba hyndai bad u la pynkhlain ia ki jingiadei ha ka imlang sahlang, kyntiew ia ka bor jong ka mariang ban iaineh bad kyntiew ia ka kam jngoh kai kaba lah ban iaineh. Da kaba ai jinghikai ia ki longiing ha kane ka jaka ha kaba iadei bad ka jingthain ia kine ki jait jingkieng bad ka jingsumar ia ka mariang, ki kam jong u ki long ka nuksa jong ka jingiaid ryntih lang jong ka kolshor, ka imlang sahlang bad ka mariang.
U Bah Hally War u dei u nongrep uba rep ia ki kwai, tympew, sohmarit bad ki jait soh bapher bapher katba u dang bteng ban trei kum u nongsumar ia ka mariang bad ka jingnang jingstad tynrai.
Ula pynpaw ka jingsngewnguh jong u halor ka jingioh ia kane ka khusnam, u Bah Hally War da kaba ai jingsngewnguh ia u Blei uba la plié lad ban pdiang ia kane ka khusnam.
Lyngba ki kam ba iaineh ban kyntiew ia ki jaka khlaw kiba don nongrim ha ki jingnang jingstad tynrai, u la noh synniang bha sha ka jingiaineh jong ka mariang bad ka bha ka miat jong ka imlang sahlang. Ki kam jong u ki long ka nuksa jong ka jingnang jingstad tynrai kaba kyrshan ia ki jingdonkam jong ka mariang ha ka juk mynta.