SHILLONG 19, Jymmang: Ka sorkar jylla ka la thung ia ka myntri ka tnad kam ain ka jylla ka Kong Ampareen Lyngdoh ban khlieh ia ka Committee halor ka Roster bad ka dei ban aiti noh ia ka kaiphod shen.
Kane ka committee kaban kynthup iaki dkhot na ki seng sain pyrthei bapher bapher, ka long ban lum ban lang, bad ban sngap ia ki jingai jingmut jong ki seng sain pyrthei halor ka Roster. Ka jingialang jong ki seng sain pyrthei kaba la khot ka sorkar mynta ka sngi, ka la mynjur ruh ban pynsangeh shwa ia ka jingkhot thungkam thymmai haduh ban ioh ia ka kaiphod na kane ka committee.
Haba kren hadien ba la wai ka jingialang, u myntri rangbah ka jylla u Conrad K Sangma u la ong ba baroh ki seng sain pyrthei kila sngew shai halor ka Roster hadien ba la ioh ia ka jingpynshai kaba bniah. U la ong ba ka Roster ka dei kaba bteng naduh u snem 1972 bad kan bteng ban treikam nangne shakhmat.
Ha kajuh ka por, ula maham ba kam long kaba dei ban thaw jingkulmar kaban wanrah pynban ia ka jingthut bad ka jingsngewiapher hapdeng ki jaitbynriew ha ka jylla. Haba jubab halor ka jingpynlong ka Voice of the People Party ia ka jingiakhih ban dawa pynkylla ia ka Reservation Policy, u Conrad u la ong ba kum ki nongialam ba don ka jingkitkhlieh, kam long kaba dei ban thaw ia kano kano ka jingsngew kaba wanrah ia ka jingsngew iapher jaitbynriew bad kaba pynthut ia ka shongsuk shongsain ha ka jylla, bad u la ong ba kam dei ban pynlong politik.