SHILLONG 17, Jymmang: U Myntri Rangbah ka jylla u Conrad K Sangma u la ong ba baroh ki myntri sorkar kila sngew hun kumno ka Roster system (ne ka jingbate kam) ka treikam. Ia kane u la iathuh hadien ba la wai ka jingialang ka kynhun myntri.
“Ngi iakren ia ka Roster System (jingbate kam) bad khlem iakren ia ka Jingbhah Thungkam ne Reservation Policy. Baroh ki myntri kila sngew hun hadien ba la ioh ia ka jingbatai pynshai (presentation) shaphang kumno ka Roster ka treikam”, la ong u Conrad.
“Ynda phi la iohi ia ka jingbatai lyngba ka presentation ha screen, phin sa shai kdar halor ka roster. Ngin pynshai ia kane sha ki nongialam seng sain pyrthei, ki sengbhalang, ki nongialam shnong ruh”, la ong u Conrad.
Ha kajuh ka por, u la ong ba ka jingpyntreikam ia ka Roster kan iaid bad bteng beit kumba la bthah ka ïing Kashari.
Halor ka jingdawa ka Voice of the People Party (VPP) ban pynsangeh ia ka jingthungkam haduh ban pynbeit ia ka Roster system, na ka liang u Conrad u la ong, “ka jingthung kam kan iaid beit, ka dei ka jingbthah ka Kashari”.