Shillong: U President ka seng ki trai bad nongniah trok u bah Mosklander Marngar ula kynnoh ba ki don ki heh spah, ki heh sorkar bad ki bar jylla kiba iasuh buit ban pyniashrut ia ki para Khasi ba kin iapait iapra.
Haba kren mynta ka sngi sha ki lad pathai khubor, u bah Mosklander ula ong ba ka jingdawa ka MCTODA ban pynkiew bai kit ia ka dewbilat na ki kompeni ka dei kaba shongnia haduh ba ka sorkar la mynjur namar ba ka seng kam pyrshah ia ka sorkar hynrei ia ki kompeni.
U la kynnoh ba ki heh spah jong ki kompeni bar jylla kila lah ban pyniashrut haduh ba ki para Khasi kila poi sha ka jingiamynsaw kumba leh ka sorkar phareng ia ki Hima Khasi mynshwa. Ula ong ba ka seng kam kwah ban ujor sha ka Human Right Commission ruh namar ba lada leh kumta, kiban ngat kin dei ki Khasi hi naduh ki ophisar, ki majistrat namar ba ka dei ka jingplan ki bar jylla najrong. U la ong ba ka seng ka la lap ba kiba bun ki ophisar, ki pulit Khasi kiba kham ieid ri ban ia ka seng ruh.
Ula iathuh ba ha ka jingiakhih dang shen ha Mawryngkneng, ki don kumba 3 ngut ki driver trok kiba la mynsaw jur hynrei kiwei kiba bun ki la mynsaw malu mala na ka jingiapyni bor bad ki pulit, kiba ula kynnoh ba dei kiba jylla hi kiba bom kiba tied.
Lah ban kdew ba dang shen ka seng MCTODA ka la pyllong ia ka jingiakhih da kaba khang iaid ia ki trok kit dewbilat, clinker na ki kompeni kum shi bynta ban dawa pynkiew ia ka bai kit.
Pyniashrut ki bar jylla bad ki heh sorkar ia ki para Khasi ban ioh nion, kam u President ka MCTODA
