Shillong: Ka KHNAM kan buddien tyngeh bad kan sei madan lut plain ia ka jingthung kam beain ia kiba haiing hasem, ki khun ki kit, ki paralok jong ki myntri sorkar, ki ophisar da kaba tih tyngeh da ka RTI.
U Working President ka KHNAM u bah Thomas Passah haba kren sha ki nongthoh khubor ula ong ba ka seng ka la pan jingtip da ka RTI na ka Secretariat Administrative Department (SAD), ha kaba ka la jubab ba kam don ki temporary hynrei ka don tang ki daily wage worker, kaba kyllain hi ialade.
Ha ka jingwad jingtip RTI, ka KHNAM ka la lap ba ka SAD ka la ai jingtip ba tang ha u Nailur 2025, kila siew bai nong 19 lak tam sha kita ki 121 ngut kiba trei ha Secretariat hynrei kim ai satia ia ki kyrteng.
Ka KHNAM ka buh jingkylli, iano ka siew tulop haba khlem ai kyrteng namar ba ka jingai tang ia ki number 121 ngut, lah ban dei ne bym don ruh, lah ban shu shna shu thaw. U Thomas ula ong ba ka SAD ka la pyrshang ban buhrieh namar ba ia kine ki briew la thung da ki heh ki hain suda bad kim nud ban ai kyrteng namar ba yn sa mih kiba haiing hasem jongki.
Ka KHNAM ka la pynkhreh ban ujor ia kane ka tnad kaba pynkhein ia ki kyndon ka RTI.
Kim nud ai kyrteng ioh paw ba thung hi ki minister, ki ophsiar ha Secretariat, byrthen ka KHNAM
