Shillong: Ka kashari International Crimes Tribunal (ICT) ka ri Bangladesh, ka la rai pynïap ia ka Myntri Rangbahduh barim katei ka Ri, ka Sheikh Hasina mynta ka sngi.
Ka Sheikh Hasina kaba 78 snem, kala shah rai pynrem ha ka Kashari halor ki kam beain pyrshah ia ka longbriew manbriew kaba la iadei bad ka jingiasumsnam da kaba thombor pyrshah ia ki paidbah ba iakhih ha u 2024.
Kane ka rai ka long kum ka jingplie jingkhang ia ka seng Jamaat-e-Islami, kaba dei ka kynhun kaba ialam ia ka jingiakhih pyrshah ia ka jingsynshar ka Hasina.
Ia mynta ka Hasina ka lah ban shong rieh ha ki bynta ka India naduh ba ka la phet krad na katei ka ri mynshem snem.
Ka ïingbishar ka la rai pynïap ruh ïa u Asaduzzaman Khan Kamal, Myntri kam pohïing barim ka ri Bangladesh halor ki kam pyntriem pyrshah ïa ka longbriew manbriew.
La pynbna ba ka Hasina bad u Kamal ki dei ki nongphetwir bad la bishar ia ki watla kim don haka por bishar.
Ha ka jingbishar, ki nongmudui ki la aiti ïa ki sakhi sabut ba ka Myntri Rangbahduh kala bthah ban pyndonkam da ka bor ban pynkut ïa ka jingïakhih ba la ïalam da ki samla pule ha u bnai Naitung bad Nailar 2024.
Ka Bangladesh mynta ka don hapdeng ka jingkhihwin hashwa ban pynbna iaka rai ha kaba ym duna ia ka 30 tylli ki bom kila bthei bad 26 tylli ki kali ki la shah thang ha kylleng ka ri, ha kine ki khyndiat sngi ba ladep watla ym shym la don kano kano ka jingjia ba sngewsih.
Ka sorkar ba shipor, kaba la ialam da u Muhammad Yunus, ka la thoh shaka Sorkar India ban aiti iaka Hasina, hynrei haduh mynta, ka India, kam pat jubab satia.
Rai pyniap ka Kashari ia ka PM barim ka Bangladesh ka Hasina | suba ba rieh ha India
