Shillong: Ka VPP ka la ai por kaba kylluid ia ka sorkar halor ka jingdawa pynkylla ia ka reservation policy ne ka bhah thungkam namar ba ka dei ka kam kaba kham jwat bad kham long syier.
U President ka VPP u bah Ardent Miller Basaiawmoit ula iathuh ba la phah ia ka jingpynkynmaw sha ka sorkar hadien ba ka Expert Committee ka la dep ban aiti ia ka report sha ka sorkar ba kan pynbna ia ka jingai jingmut jong ka Expert Committee halor kane ka bhah thungkam.
Ha ka jingshisha, la khmih lynti ba ka sorkar kan wanrah ia ka kaiphod ha ka dorbar kaba la dep hynrei kam shym la leh kumta. Ula ong ba lada ka sorkar ka dang pynslem, ym banse ban pynkhih ban dawa ba ka sorkar kan sei madan noh ia ka kaiphod.
U bah Ardent u la ong ba ki kwah ban iohi noh ia ka kaiphod khnang ba ki paidbah kin sngewthuh bad ngeit skhem ba ka kaiphod kan iaid kumba la dawa ban pynkylla katkum ka jingbun briew hapdeng u Khasi-Jaintia bad Garo.
Ka Expert Committee ka la dep aiti ia ka kaiphod la san bnai eiei mynta sha ka sorkar halor kane hynrei ka sorkar jylla ka dang buhrieh khlem pat sei madan haduh mynta.
La ai por kylluid ia ka sorkar ban sei ia ka report ka expert committee, ong bah Ardent
