Shillong: U President ka Voice of the People Party (VPP) u bah Ardent M Basaiawmoit u la ong ba ka long kaba eh ban pyniatylli ia uno uno u nongialam uba don la kajong ka nongrim, ka thong bad ka jingtmu ban synshar hok bad uba shu kwah ban kamai spah bad kyrdan ialade.
U Bah Ardent uba dei ruh u MLA ka Nongkrem ula ong ba kam long kaba suk ban pyniatylli lymda don kajuh ka rukom pyrkhat, kajuh ka jingthmu namar ba mano mano ruh lah ban rung sha ka jingiatylli hynrei lada ka jingiatylli ka long tang ban jop elekshon, ban ioh sorkar, kam don jingmut khlem ka thong na ka bynta u paidbah, bad ka ri bad ka jaitbynriew.
Kane ka dei ka histori kaba jia bad kan iai lada kita kiba khot ia ka jigiatylli kim don ka nongrim kaba skhem bad kaba shai.
U la ong ba u paidbah uba mynta ula pher ban ia kito ki san ki shiphew snem mynshwa ha ka rukom pyrkhat bad rukom sngewthuh ha ka elekshon bad ka politik lyngba ka jingpynshai na ka por sha ka por. Ka jingieid matlah ia ka party lada pynieng ia u maw u thlong ka la sdang hiar ha ka jingmut jingpyrkhat u paidbah bad u paidbah ula phai sha ka VPP watla ki don kiba pyrshang ban pynsngewthuh bakla hynrei ka party kan sa mih ban pynshai biang ia ka jingiaid lynti jongka.
Ula kyrmen skhem ba ka VPP kan sa ioh ia u lakam ban synshar ha u 2028.
Halor ka party sha rilum Garo, ula ong ba ki don ki nongtrei kum u Organising secretary hynrei ka dang iaid suki namar ba donkam ba kin sngewthuh bha shwa ia ka nongrim ka party, namar ba ka elekshon ha Garo Hills ka la kham iapher watla ki paidbah ha Garo Hills ruh ki kwah ia ka jingkylla tangba ka dang donkam ia ka jingpynshai ha kano ka rukom ki donkam, ki kwah ia ka jingkylla.
Ula bynrap ba na ka bynta ka elekshon GHADC kaban long lashem snem, ka la don ka jingiakren ia ki nongialam tangba kam pat rai ban iashim bynta ne em ha kane ka elekshon.
Iatylli tang ia ka elekshon ym don jingmut, u paidbah mynta ula pher ban 10 snem mynshwa| Ym pat rai ia ka elekshon GHADC: Ardent
