Shillong: Ka sorkar jylla ka la theh ia ki kam pynroi ban kyntiew ia ka jylla bad mynta ka sngi, ka 8 tarik Naiwieng 2025, u myntri rangbah ka jylla u Conrad K Sangma ula plie ia ka ophis ka Meghalaya Public Service Commission (MPSC) ha Dakopgre, Tura, West Garo Hills.
La sakhi lang u Speaker, Meghalaya Legislative Assembly, Thomas A Sangma bad kiwei.
U myntri rangbah ula ong ba kane ka ophis MPSC kan pyllait ia ki paidbah ka rilum Garo kiba hap ban iaid 10-15 kynta ban poi sha Shillong ban ialeh ia ki eksamin hynrei mynta kim donkam shuh.
U la ong ba bun kiban thait ban jrem tang haba shong kali na Tura sha Shillong ban leit sha kamra eksamin kaba buh jingeh ia ki ban ioh ban leh bha ia ki eksamin na ka jingthait ka jingjrem hynrei mynta ki lah ban ialeh tang ha Tura.
U la pyntip ruh ba ka eksamin kaba nyngkong jong ka MPSC ha Tura kan long ha ka 14 tarik Naiwieng 2025 bad ka dei ka lynnong kaba thymmai ha ka histori ka MPSC.
Ula ong ba yn plie ruh ia kum kane ha Jaintia Hills bad ha kiwei ki jaka ha ka jylla ban pynsuk ia ki samla.
Ha kane ka sngi, u myntri rangbah ula leit jurip ruh ia ka jingiaid ka jingpyntrei ia ka P.A. Sangma Sports Complex ha Tura. Kane ka jingleit jngoh ka long ia ka Indoor swimming pool, nalor ka indoor badminton, basketball bad ka volleyball court namar ba ia ka madan phutbol la dep ban shna. Kane ka madan kan pdiang ruh ia ka National Games ha u 2027.
Shwa ia kane, u myntri rangbah ula buh maw nongrim ruh ban tei ia ka Additional Secretariat ha Tura ryngkat ka jingsynran lang ki heh sorkar bad ki nongialam Balang bad kiwei.
Tuid ki kam pynroi ha rilum Garo, plie u Conrad ia ka MPSC, jurip ia ka PA Sangma stadium
