Shillong: U Deputy Commissioner ka East Jaintia Hills ka la pynshai ia ka jingiakhih ka seng Meghalaya Commercial Trucks Owners and Drivers Association (MCTODA) ka kwah ban iapynbeit halor ki jingeh jongki khlem da pynwit pynthut ia ka kit ka bah jong kiwei.
Haba kren mynta ka sngi, u DC ka East Jaintia Hills ula ong ba hadien ka jingpynbna iakhih ka MCTODA naduh ka 27 tarik Risaw, ka bor district ka la khot iakren ban pynbeit ia ka jingeh jong ki nongniah bad ki trai trok ha ka 3 tarik Naiwieng 2025, ha kaba la wan iashim bynta ka Jaintia Hills Cement Manufacturers Association (JHCMA), ka Jaintia Hills Truck Owners Association (JHTOA) bad ka East Jaintia Hills Truck Owners and Transporters Association (EJHTOTA).
Hynrei ha kane ka jingkhot iakren, ka MCTODA kam shym la wan iashim bynta bad la wan iashim bynta tang ka HTOA bad ka EJHTOTA ha kaba ki pynpaw ba kim kyrshan ia ka jingiakhih ka MCTODA.
Hadien kane, ha ka 31 tarik Risaw bad ha 3 tarik Naiwieng 2025 hapdeng ka JHCMA bad ka MCTODA kila iashong jingialang ban iathir ia ki mat jong ka MCTODA kiba kynthup ia ka dor kit, ban khang lad ia ka jingkit palat pud, ban pynbiang ia ki jaka ieng kali, ban siew biang por bad ban pynbiang ia ka bai bylla.
La pynshai da ka JHCMA ba ka dor kaba la buh ka sorkar hapoh Meghalaya la pyntreikam da ki kompeni shna dewbilat.
Hynrei ka MCTODA ka la dawa ba kajuh ka dor dei ban siew haba kit na Meghalaya shabar jylla ruh. U DC ula ong ba ka long kaba donkam ban sngewthuh ba ki kyndon ka Motor Vehicles Act, 1988 ha kaba ka sorkar jylla kam lah ban pynbna ia ka dor kit shabar ka jylla. Ka kit ka bah hapdeng ki jylla, ka shong katkum ka iew ka hat, ka jingjngai, bad ka jingiasngewthuh jingmut hapdeng kiba kit bad kiba wanrah mar. Namarkata, ka jingdawa ban pyntreikam ia ka dor kaba la buh ka sorkar Meghalaya shabar jylla ka long beain bad ka long pyrshah ia ka ain jong ka bor ka sorkar jylla.
U DC ula ong ba wat bun na ki mat ba la rah ka MCTODA la pdiang da ki kompeni shna dewbilat, ka MCTODA ka kyntait ban weng ia ka jingiakhih bad ka bteng ban pynwit ia ka iaid ka ieng jong ki trok kiba kit dewbilat ha ka National Highway-6. La ioh repot ruh ba la don ki jingjia kiba shah pynjulor ki kali bad shah pyndik ha ki nongniah kali.
pulit ka district ka East Khasi Hills kila shim ia ki lad ki lynti ban pynkhuid ia ka jingshah khang ki kali, ban pynbeit iaka iaid ka ieng ki kali bad ban ai ka jingshngain ia ki nongleit nongwan.
Ha kajuh ka por, u DC ula ong ba ki nongialam ka JHTOA bad ka EJHTOTA kila pynpaw ia ka jingsngew khia ba ka kamai kajih jongki ka la shah ktah na ka jingshah pyndik beain ha ka jingiakhih ka MCTODA. Ki la pan jingkyrshan na ka bor district ban pynthikna ban ym shah pyndik ha ka leit ka wan jong ki kali jongki.
Ka bor district ka East Jaintia ka la ban jur ba ka kut jingmut ban pynbeit ia ki jingeh lyngba ka jingiakren. Kino kino ki seng ki kynhun ki lah ban pynsngew ia ki jingeh jongki hynrei kim don hok ban shim ia ka ain ha ka kti, ban pynthut ia ka leit ka wan ki paidbah ha ki surokbah ne ban pynthut ia ki kali kit ia ki mar ba kongsan.
Ka bor district kan bteng ban iakren ia ki kynhun naduh ka MCTODA, JHTOA, EJHTOTA, bad ka JHCMA ban pynbeit ia ki jingeh lyngba ki lynti jong ka ain.
Wat shim ia ka ain ha kti, maham u DC ia ka MCTODA
