Shillong: Ka seng Hynñiewtrep National Youth Front (HNYF) Southern Border Area ka la kam ba ka surok kaba sniew tam ha Meghalaya ka dei na Weiloi-Mawsynram-Umpung-Phutkroh shaduh Balat.
Ka seng ha ka jingialam u President ka seng u bah Kyllang S Thongni mynta ka 4 tarik Naiwieng 2025, ki la kynduh ïa ka Deputy Commissioner jong ka East Khasi Hills District ka Kong Rosette M Kurbah ban ujor ia ka jingsniew tasam kane ka surok kaba shyrkhei haduh katta katta.
U Bah Kyllang Thongni u la ong ba ka jingsniew ka surok sha kine ki thaiñ ka la long kaba la palat pud bad kaba la palat liam ha kaba ka la pynsohsat ïa ki paitbah nongleit nongwan kiba ïaid na katei ka jaka bad kumta ka seng ka la wan ban pynsngew hakhmat ka DC namar kam kwah shuh ban ïohi ïa kum kine ki jingjia nangne shakhmat.
Ula ong ba lada ka sorkar kam leh eiei, ka seng kan leh ia kaba donkam kampher lada dei ban iatyngkhuh ha kano kano ka dur ruh.