Shillong: ki nongialam jong ki seng sain pyrthei bapher bapher ka thain North East kila iamih ban iatylli lang mlon ban thaw ia ka shatri ka One North East.
Ia kane la pynbna mynta ka sngi ka 4 tarik Naiwieng 2025 ha New Delhi da ki nongialam jong ki seng sain pyrthei na kane ka thain North East ban iakhun ia ki jingangnud jong ki paidbah ka thain.
Ki nongialam kiba iadon bynta lang ki kynthup ia u Conrad K Sangma, Myntri Rangbah ka Meghalaya jong ka National President ka National People’s Party (NPP), u Pradyot Bikram Manikya, Nongseng ka TIPRA Motha Party, u Mmhonlumo Kikon, Nongaiktien barim ka BJP bad Myntri Sorkar na Nagaland bad u Daniel Langthasa, Nongseng jong ka People’s Party, Assam.
Kane ka kynhun thymmai kan shim ia ka jingai mynsiem na ki jingiohi jngai bad ka nam jong ki Nongialam ka thain kiba la leit noh, kiba la iakhun na ka bynta ka jingithuh kyrpang bad ka roi ka par jong ka thain Shatei Lam Mihngi.
Ban pyntyllun ia kane ka thong, kila thaw ia ka Committee ban shong pyrkhat bad iakren halor ki kam kiba dei ban leh, kynthup ki rukom treikam bad ka rukom long jong kane ka seng sain pyrthei ba tyrwa ban thaw.
Ka jingthaw ia ka “One North East” ka long ban sei ia ki nongialam na ka thain bad ban wanrah ia ka sur kaba khlain ha ka sain hima sima na ka bynta ki phra tylli ki Jylla ka thain Shatei Lam Mihngi ha ki rynsan jong ka Ri.
Mih ka lama ka One North East | Iatylli ki nongialam ki jylla ka North East
