Shillong: U myntri ka tnad pule puthi ka jylla u bah Lahkmen Rymbui ula ong ba ka sorkar ka phikir bad shim khia bhai a ki khynnah skul khamtam ki khynnah skul kynthei khamtam ha ka por ba ki mih bnai, khnang ba kan ym pynwit ia ka jingwan jongki sha ki skul.
Haba kren mynta ka sngi, u bah Lahkmen ula ong ba ka tnad pule puthi ka shim khia ia ki khynnah skul kynthei ym tang hapoh skul hynrei shabar ruh kumjuh.
Ka la don ka jingtip ba ki don bun ki khynnah skul kynthei kiba pep skul noh tang namar ba ki hap ban sumar ialade ha ka por ba ki mih bnai bad ka tnad pule puthi kan iatreilang bad ka tnad Social Welfare ruh halor kane.
Ha kajuh ka por, u la ong ba ym tang ia ki khynnah skul hynrei ka sorkar ka la shim khia ban pynbha ruh ia ki ïing skul, ka jinghikai namar ba ki khynnah ki dei ka lawei jong ka jylla. Bad dei tang kane ka sorkar kaba la shim khia ban tei ia ki skul kiba la jot namar ba ka thong ka long ba khlem ka ïing skul kaba bha, ym lah ban ai ka jinghikai kaba paka.
Ka sorkar ka phikir bha ia ki khynnah skul kynthei ba kin ym pep skul por mih bnai, ong u myntri
