Shillong: U MP ka Shillong u Dr. Ricky AJ Syngkon ula ujor sha u myntri ka Road Transport & Highways, u Nitin Gadkari bad sha u myntri ka Environment, Forest and Climate Change u Bhupender Yadav halor ka jingshah pynjot ki wah kynthup ka wah Umgot ha thain Dawki bad ka wah Umiew ha Umtyngar na ka jingtih surok ha ka of NH-40 khlem phikir ia ka mariang na Shillong sha Dawki.
Ha ka shithi, u MP ula kdew ba ka National Green Tribunal ka la dain kuna haduh ₹2 klur ia ka NHIDCL halor ka jingpynjot jongka ia ka wah Bhagirathi ha Uttarakhand ba ka tih surok khlem phikir ia ka mariang.
Ia kane ka surok kaba 71 kilometre la pyntrei ka NHIDCL ba la bei pisa ka Japan International Cooperation Agency (JICA).
U MP ula ong ba ka wah Umngot kaba ai jingim ia ki paidbah ka thain na ka jingkhuid jongka ban khring ia ki nongwankai, ka la kylla ktieh bad ka bym don jingim shuh ha une u bnai Risaw na ka jingtuid ka khyndew na ka jingtih surok ka kompeni bad kane ka la ktah ia ka kam ka jam bad ka kamai kajih jong ki paidbah.
Ula ong ba ka jingbret bad khawah pathar ka kompeni ia ka khyndew sha ka wah Umiew ha Umgyngar ruh kala pynjot ia ki kynja ba im bad ka la ktah ia ki briew khamtam ki briew ruh kumjuh.
Kane ka jingleh ka dei ka jingpynkhein ia ka ain jong ka mariang namar ba la shu tih khlem ki rukom pyniaid kiba biang ban iada ia ka mariang bad wat ka Meghalaya State Pollution Control Board ruh kam shym la leh eiei halor kane kumba leh kiwei ki Board ha kiwei ki jylla.
U MP ula ong ba ka la donkam kyrkieh ban pynthikna ka la don ne em ka jinglum jingtip bad kaiphod na ka Environmental Impact Assessments (EIA) bad ka jingpeitngor halor kane.
Ula dawa ba dei ban sangeh ban ot pathar ia ki lum bad bret pathar ia ka khyndew ha ki jaka kiba ktah ia ki wah bad dei ban don ka jingleit jurip na ka MoRTH, MoEF&CC, CPCB, SPCB,
NHIDCL, bad ka JICA. Ka NHIDCL ka dei ban buria ia ka jingduh ka jingjot ki wah bad dei ban leit jurip man ka por ia ka jingiaid ka kam bad ka rukom pyntrei bad dei ban pynkhuid biang ia ka jingpynjaboh ia ki wah nalor ban don ki kyndon ia ki ophisar kiba pyntreikam ia kane ka projek kaba ktah ia ka mariang.
Ujor u MP ka Shillong sha u myntri ba shah pynjot ka wah Umngot, Umtyngar
