Shillong: Ka National People’s Party (NPP) ka la ai jingthoh sha u Chief Electoral Officer (CEO) ka tnad elekshon ban dawa ba ka dei ban ithuh ia ki syrnot na ki Rangbah Shnong, Nohkma bad na ki nongialam niam ban pynshisha ia ka sngi kha bad ka jaka sah jong u briew na ka bynta ban pynrung kyrteng kum u nongthep vote.
U general secretary ka NPP, u Dr. Donkupar ula ong ba kane ka jingdawa ka long ba ka ECI ka dei ban pdiang ia ki syrnot jong ki rangbah shnong, nohkma khamtam ha kane ka jylla, kaba kdup da ka Sixth Schedule ka riti synshar ka ri.
Kane ka jingleit dawa ka NPP ka long hadien ba ka Election Commission ka India ka la pynkhreh ban pynthymmai ia ka jingpynrung bad weng kyrteng ia ki nongthep ne ka Special Intensive Revision (SIR), kumba ka la leh ha jylla Bihar bad kumjuh ha ki 12 tylli ki jylla ha ka ri kaban sdang naduh ka 1 tarik Naiwieng 2025.
Na ka liang ka NPP, ka la dawa ruh na ka ECI ba ka dei ban pynbeit pali ha ki bnai kiba kham kylluid namar ba ha ki bnai Naiwieng, Nohprah, ki don ki eksamin ia ki khynnah skul bad kan long ka jingeh ia ki kmie ki kpa bad ki nonghikai kiba lah ban ngat kum ki BLO ha kane ka jingleit pynrung bad weng kyrteng ia ki briew ha man ki thliew ïing.
Pdiang ia ka syrnot u Rangbah Shnong, Nohkma, nongialam niam ban pynrung kyrteng nongthep vote
