Shillong: Ki pulit hynne ka step sngi ki la ïoh kem noh ïa uwei u briew ba suba leh kynshleiñ ïa ki khynnah kynthei ha ka thaiñ Laitumkhrah, bad ïa une u ba la tip kyrteng da u Tamdorlang Risaw (42 dnem), na Nongrah Block II, Shillong, la kem na kawei ka shnong ba tip da ka Tawang ha Mawsynram, ha kaba la ïoh ban kem da u Officer-in-Charge, Mawsynram Police Station bad ka kynhun bad ka ïoh kurup noh ruh ïa ka kali Bolero ba la pynkylla dur.
Katkum ka tyllong khubor na ki pulit ïa utei u suba riew kynshleiñ yn sa rah noh sha Kashari ban tian bishar.
Katkum ka jingpyntip na u Superintendent of Police ka East Khasi Hills, u Bah Vivek Syiem, ki pulit ka Laitumkhrah Police Station ha ka 15 tarik Risaw, 2025, ki la ïoh artylli ki ujor ejahar na arngut ki briew, kiba la ujor ba ki la shah leh kynshleiñ baf shah buddien ha ki jaka paidbah ha uwei u briew ba ñiah ïa ka kali Bolero kaba don ïa u number Laitumkhrah ML05P 7884.
Katkum ka jingpyntip na une u heh pulit kane ka jingjia ka la jia ha ki thaiñ Laitumkhrah, bad ka dei kajuh ka jingjia kaba la leh da ujuh u briew bad da kajuh ka kali.
Kham mynshwa la ïoh jingtip ba ha u Jymmang mynta u snem 2025, ha kaba katei kajuh ka kali la ong ba la ïohi ha ki thaiñ Don Bosco Square, Shillong. Ha katei ka por ruh u briew ba ñiah ïa katei ka kali u la leh kynshleiñ bad khlemakor hakhmat paidbah ba don ha kitei ki bynta.
Katkum ka ejahar ba la ujor sha ki pulit, la ong ba ha ka 17 tarik Nailur ha ka surok Dhankheti-Malki, katei kajuh ka kali la ïohi ba ka leh ïa ki kam kynshleiñ, ba kynthup ka jingleh khlem raiñ bad pynlehraiñ paidbah.
Katkum ka ejahar la ong ha ha ka 23 tarik Nailur, 2025, ha ka por kumba 8:00 janmiet, kawei ka Bolero ïong ka la ïeng hakhmat kawei ka nongujor kaba don lang bad ki paralok hajan Don Bosco Laitumkhrah bad la leh ïa kajuh ka kam kynshleiñ shwa ba u nongñiah un phet na katei ka jaka.
U SP u la pyntip ruh ba ka jingjia ba dang shen ka dei ha ka 13 tarik Risaw 2025 ha ka por kumba 5:20 janmiet, hajan Loreto Convent, Shillong. Ka nongujor ka la pyntip ba katba ka dang ap Rapido, katei kajuh ka Bolero ka la leit pynwit ha kaba u nongñiah u la sangeh ïa ka kali hakhmat jong ka khynnah bad pynhap ïa ka ïit kali, ha kaba u la leh ïa ki kam kynshleiñ, ha kaba u la buddien ruh ïa katei ka khynnah bad khang lynti ruh ïa ka.
Hadien ba la buddien ïa baroh artylli ki jingujor, ha Laitumkhrah Police Station, la pynlong ka jingkhynra da ka jingïatreilang baroh ki police station ha East Khadi Hills haduh ban ïoh kem ïa une u briew bad kurup ruh ïa ka kali.
Shah kem uba leh kynshlein na Bolero ia ki kynthei ha thain Laitumkhrah uba sah ha Nongrah
