Shillong: Mynta ka sngi, ki paidbah nongrep ka Lapangap bad ki shnong ba marjan kila hiar sha pynthor ban pyndep noh ia ka jingot kba ha katei ka shnong.
Kane ka jingot kba ka la sdang ha ka 22 tarik mynta u bnai Risaw, ha kaba ki nongrep kila mih paidbah ban leit ot kba khnang ban pyndep noh kham kloi hadien ba ka la don ka jinghuri hura ha katei ka thain bad ki briew na Assam.
La synran lang ia ki nongrep da ki pulit ka Meghalaya khnang ban ym mih kano kano ka jingjia hadien ba ka la don teng ka jingshah pynwit na ki briew na Assam kiba sah ha katei ka thain ia ki briew ka Lapangap ban leit ot kba ha kitei ki pynthor.
Mynta ka sngi, kaba dei ka sngi kaba saw ba kila iamih paidbah ban pyndep noh ia ka jingleit ia u kba. La sakhi ba ki paidbah na ki shnong ba marjan kila mih da ki phew kali ban leit iarap ia ki nongrep ka Lapangap ban pyndep noh ia ka jingleit ot kba.
Dang shen, ki ar tylli ki shnong, kata ka Lapangap na Meghalaya bad ka Tapat na Assam, ryngkat ka jingsakhi lang ki briew sorkar na Meghalaya bad Assam kila iamynjur ban pynneh ia ka shongsuk shongsain ha katei ka thain.
Ka Lapangap ka hap ha Wahiajer konstitwensi jong ka Thadlaskein Block, ka West Jaintia Hills.
Kumba 2000 ngut hiar ki nongrep ban leit pyndep ot kba ha Lapangap
