Shillong: Ka jingleh Puja khamtam jong ki riew ngeit Hindu, ka la iaid ha kane ka shi taiew kynthih ha kylleng ka ri. Hynrei ha kane ka jylla Meghalaya, kaba kham kyrpang ka long ba ka jingleh Puja ka la long kaba shongkun bha ha kawei ka shnong kaba la wan iuhkjat nyngkong u nongseng ia ka Ram Krishna Mission.
Kane ka dei ka shnong Disong ka Shella, ha East Khasi Hills, kaba don ha thain khappud ka India bad ka Bangladesh.
Katkum ka jingiathuh ki riew rangbah katei ka shnong, ia ka Ram Krishna Mission la wan seng nyngkong ha ka snem 1924 da u Swami Prabha Nanda Maharaj uba wan na thain Sylhet mynshwa, kaba hap ha Bangladesh mynta. Ha katei ka thain, ki don ruh ki Khasi kiba mane ia ka jingngeit Hindu.
Dei na katei ka shnong, ba la pyniar sha ka Ram Krishna Mission sha Sohra bad sha kylleng kiwei pat ki jaka ka ri Khasi-Jaintia.
Ka Puja ka la sdang 27 tarik bad kan kut ha ka 2 tarik, kata mynta ka sngi ha kaba ki Khasi ruh ki don bun kiba mane ia ka jingmane Hindu ha katei ka shnong.
La iathuh ba katei ka jaka ka dei kaba sdang ban leh Puja ha kito ki snem, ha kaba ki Khasi ki iashim bynta.
Shongkun ka Puja ha shnong ba wan iuhkjat nyngkong ka Ram Krishna Mission
