Shillong: U Syiem ka Hima Sohra u Paiem Freeman Sing Syiem ula ong ba ka Hima ka shimti ban pyniaid hi ia ka jaka jngohkai Dain Thlen katba ia ka Weisawdong yn pyniaid ka Laitduh.
Haba kren halor kane dang shen, u Paiem Freeman ula ong ba ha u pud sawdong ha ka Dain Thlen, ka don ka jingujor ka Umblai, Mawphu, Laitduh bad Laitlyndop bad ka la don ka mukotduma kaba poi sha Khasi Hills Autonomous District Council (KHADC) bad ka Executive Committee ka KHADC ka la ai bor ha ka Hima Sohra ban pynbeit ia ka rukom synshar ia u pud u sam.
Da ka jingai bor ka KHADC, ka Hima ka la leh ia kane da kaba leit sorjamin bad la ai ia ka rai halor u pud u sam sha ka KHADC bad ka KHADC ka ai sha ki shnong.
U Paiem ula ong ba ka Laitduh, Laitlyndop kim don jingujor eiei halor kane ka rai ka Hima bad ka bym ioh ia kano kano ka jingpyntip, ka dei sa ka Umblai bad ka Mawphu kim pat pynmih kano kano ka rai ba ki mynjur ne pyrshah.
U la iathuh ba na ka liang u Sub-Divisional Officer (SDO) ka Sohra ula pynmih ia ka hukum ba ha kaba iadei ka Weisawdong, ka dei ban iaid beit bad ia ka jaka jngohkai ha Weisawdong la khrong ka shnong Laitduh.
U SDO ula pynmih hukum ba kiba pynwit pynthut kin hap ha ka bor ka ain.
Shuh shuh ula pyntip ba na ka liang ka Laitlyndop bad ka Laitduh kila pyntreikam ia la kajong ka jaka katkum u pud u sam bad na ka liang ka Hima ruh kan lum khajna ha ka Dain Thlen baroh kawei.
Pyniaid ka Hima ia ka Dain Thlen, ka Laitduh ia ka Weisawdong
